چیف الیکشن کمشنر سکندر سلطان راجہ اور نگران وزیراعلیٰ محسن نقوی کی زیر صدارت وزیراعلیٰ ہاؤس میں اجلاس ہوا جس میں الیکشن کمیشن کے چاروں صوبائی ارکان اور پنجاب کابینہ نے شرکت کی۔
اجلاس میں عام انتخابات کے سیکورٹی انتظامات پر بریفنگ بھی دی گئی اور اس دوران عام انتخابات کے پرامن، آزادانہ اور منصفانہ انعقاد کو یقینی بنانے کے عزم کا اظہار کیا گیا۔
عام انتخابات کے سلسلے میں نگرا پنجاب حکومت الیکشن کمیشن کے ساتھ کوآرڈینیشن کے لیے فوکل پرسن کا تقرر کرے گی۔
اجلاس میں گفتگو کرتے ہوئے چیف الیکشن کمشنر نے کہا کہ عام انتخابات مقررہ وقت پر ہوں گے، انتخابات کا وقت قریب ہے، سب کو صاف شفاف الیکشن کو یقینی بنانا ہوگا جس کے لیے الیکشن کمیشن تیار ہے۔
انہوں نے کہا کہ نگران آزادانہ اور منصفانہ انتخابات کے لیے پنجاب حکومت کا بھرپور ساتھ دیں گے، پنجاب حکومت کے اب تک کیے گئے اقدامات سے مکمل مطمئن ہیں، حلقہ بندیوں کا مرحلہ 30 نومبر تک مکمل کر لیا جائے گا۔
