برطانوی خبر رساں ادارے کے مطابق 7 اکتوبر سے لبنان کے سرحدی علاقوں میں اسرائیلی افواج کے ساتھ کشیدگی کے بعد حزب اللہ کی جانب سے پہلی بار ایسا دعویٰ کیا گیا ہے۔ حزب اللہ نے دعویٰ کیا ہے کہ اسرائیلی سرحد سے 5 کلومیٹر دور لبنانی علاقے خیام میں اسرائیلی ڈرون کو نشانہ بنایا گیا جو اسرائیلی حدود میں گرا۔واضح رہے کہ 7 اکتوبر سے غزہ پر اسرائیلی جارحیت کے بعد حزب اللہ اور اسرائیلی افواج کے درمیان روزانہ جھڑپیں ہوتی رہتی ہیں تاہم پہلی بار حزب اللہ کی جانب سے اسرائیلی ڈرون کو مار گرانے کے لیے زمین سے فضا میں مار کرنے والے میزائلوں کا استعمال کیا گیا ہے۔
حزب اللہ کا دعویٰ ہے کہ گزشتہ تین ہفتوں میں اسرائیل کے 42 مقامات پر 84 حملے کیے گئے ہیں۔گزشتہ روز فلسطینی مزاحمتی تنظیم حماس کے عسکری ونگ القسام بریگیڈز نے اسرائیل کے اہم ترین شہر دیمونا کو نشانہ بنانے کا دعویٰ کیا تھا۔اسرائیل کے صحرائے نیگیو میں واقع دیمونا شہر اپنی خفیہ حساس ایٹمی تنصیبات کی وجہ سے اہم ہے تاہم یہ معلوم نہیں ہوسکا کہ حماس کے حملے میں صہیونی فورسز یا حساس علاقے شامل تھے۔ ایٹمی تنصیبات کو کوئی نقصان پہنچا یا نہیں؟
