اردوورلڈ کینیڈا( ویب نیوز)امریکی ریپبلکن صدارتی امیدوار ڈونلڈ ٹرمپ نے کہا ہے کہ میں نے جمہوریت کے لیے گولی کھائی، میں اس کے لیے خطرہ کیسے بن سکتا ہوں۔
مشی گن میں ریلی سے خطاب کے دوران ڈونلڈ ٹرمپ نے ڈیموکریٹک پارٹی پر طنز کرتے ہوئے کہا کہ انہیں یہ بھی نہیں معلوم کہ ان کا صدارتی امیدوار کون ہے۔ یہ پارٹی نہیں بلکہ جمہوریت کی دشمن ہے۔
انہوں نے کہا کہ کہا جا رہا ہے کہ میں جمہوریت کے لیے خطرہ ہوں، میں نے جمہوریت کے لیے گولی کھائی ہے، میں جمہوریت کے لیے کیسے خطرہ ہو سکتا ہوں۔ جو بائیڈن امریکی تاریخ کے بدترین صدر ہیں۔
سابق امریکی صدر نے کہا کہ اگر حقیقی قیادت ہو تو جو بائیڈن کے پیدا کردہ ہر بحران کو حل کیا جا سکتا ہے۔ 4 سال پہلے ہم ایک عظیم قوم تھے، ہم امریکہ کو ایک بار پھر ایک عظیم قوم اور پرامن ملک بنائیں گے۔ پہلے سے زیادہ متحد ہونے کی ضرورت ہے۔
انہوں نے کہا کہ حالیہ انتخابات امریکی تاریخ کے اہم ترین انتخابات ہیں۔ یہ تو معلوم نہیں کہ ڈیموکریٹس کا صدارتی امیدوار کون ہوگا لیکن یہ بات یقینی ہے کہ جو بائیڈن ماضی کی جعلی یاد بن جائیں گے۔
ٹرمپ نے دعویٰ کیا کہ ان کا پروجیکٹ 2025 سے کوئی تعلق نہیں اور نہ ہی وہ اس بارے میں جاننا چاہتے ہیں، یہ ان کے خلاف پروپیگنڈا ہے۔