اردو ورلڈ کینیڈا ( ویب نیوز )مری میں لینڈ سلائیڈنگ، پنڈی اسلام آباد کے نالوں میں طغیانی کا خدشہ پی ڈی ایم اے نے شدید بارشوں کے پیش نظر مری میں لینڈ سلائیڈنگ اور پنجاب کے مختلف شہروں میں سیلاب کی وارننگ دی ہے۔
ترجمان پی ڈی ایم اے کے مطابق مون سون ہوائیں آج سے ملک میں شدت کے ساتھ داخل ہورہی ہیں جس کے باعث آج سے 12 جولائی تک راولپنڈی، گوجرانوالہ، سرگودھا، ساہیوال سمیت پنجاب کے مختلف علاقوں میں بارش کا امکان ہے۔
پی ڈی ایم اے کے مطابق آج اور کل بارشوں سے اسلام آباد، راولپنڈی اور لاہور کے نشیبی علاقے زیرآب آنے کا امکان ہے جب کہ موسلا دھار بارش سے اسلام آباد، راولپنڈی اور گوجرانوالہ ڈویژن میں طغیانی کا بھی خدشہ ہے۔
پی ڈی ایم اے کے ترجمان کا کہنا ہے کہ بارشوں کے باعث مری میں لینڈ سلائیڈنگ کا خطرہ ہے، اس لیے مسافر اور سیاح محتاط رہیں، دریاؤں اور نہروں میںنہ نہائیں اور نشیبی علاقوں میں پارکنگ سے گریز کریں۔
