اردوورلڈ کینیڈا( ویب نیوز)جمعیت علمائے اسلام ف کے سربراہ مولانا فضل الرحمان نے دعویٰ کیا ہے کہ پی ٹی آئی نئے انتخابات کے لیے خیبرپختونخوا اسمبلی تحلیل کرنے کے لیے تیار ہے۔
میڈیا سے گفتگو کرتے ہوئے فضل الرحمان کا کہنا تھا کہ دیگر سیاسی جماعتوں سے اختلافات ہیں، پی ٹی آئی کے ساتھ تلخی تھی، بانی پی ٹی آئی سمیت سیاستدانوں کے خلاف کارروائی نہیں ہونی چاہیے۔
جے یو آئی کے سربراہ نے کہا کہ پارلیمانی اور بلدیاتی انتخابات ایک ساتھ ہونے چاہئیں، جے یو آئی نے پی ٹی آئی سے مذاکرات کے لیے کمیٹی بنا دی، جے یو آئی نے کامران مرتضیٰ کی سربراہی میں کمیٹی تشکیل دی۔
جے یو آئی کی جانب سے بنائی گئی کمیٹی میں مولانا لطف الرحمان، فضل غفور، اسلم غوری، مولانا امجد شامل ہیں۔
مولانا فضل الرحمان نے کہا کہ کمیٹی پی ٹی آئی کے ساتھ باہمی مشاورت سے حکمت عملی طے کرے گی، نگران سیٹ اپ کا تصور ختم کیا جائے، پی ٹی آئی سے تعلقات معمول پر لا رہے ہیں۔