اردو ورلڈ کینیڈا ( ویب نیوز ) محکمہ موسمیات نے مزید موسلا دھار بارش کا امکان ظاہر کر دیا، الرٹ جاری، ڈیزاسٹر مینجمنٹ حکام طوفان کے ایک اور سپیل سے نمٹنے کی تیاریاں کر رہے ہیں، ملک بھر میں مون سون کے طاقتور سسٹم کے باعث شدید بارشیں ہو رہی ہیں، بالخصوص سندھ اور بلوچستان میں بارشوں کا امکان ہے۔ بلوچستان کے بعض علاقوں میں بارشوں کے باعث سیلاب کا خطرہ ہے۔
محکمہ موسمیات کی جانب سے ملک بھر میں مزید بارشوں کی پیش گوئی کے بعد نیشنل ڈیزاسٹر مینجمنٹ اتھارٹی نے الرٹ جاری کردیا۔ بحیرہ عرب میں آئندہ 3 روز کے دوران بارش کی پیش گوئی کی گئی ہے۔
مون سون بارشوں کے موجودہ سپیل کے نتیجے میں گزشتہ روز مزید 4 اموات ہوئیں، جن میں خیبر پختونخوا میں 3 اور گلگت بلتستان میں ایک ہلاکت شامل ہے، رواں ماہ کے شروع میں مون سون کی بارشوں کے آغاز کے بعد سے مختلف حادثات و واقعات میں 160 سے زائد شہری جاں بحق ہو چکے ہیں۔
