اردو ورلڈ کینیڈا ( ویب نیوز ) اقوام متحدہ کی سلامتی کونسل کے اجلاس نے بے ضرر آلات کے غلط استعمال کو انسانی حقوق کے بین الاقوامی قوانین کی خلاف ورزی قرار دیا۔اقوام متحدہ کے ہائی کمشنر برائے انسانی حقوق وولکر ٹرک نے کہا کہ لبنان پر اسرائیل کے حملے کو جنگی جرم قرار دیا جا سکتا ہے۔انہوں نے کہا کہ شہریوں پر تشدد کے ذریعے دہشت پھیلانا جنگی جرم ہے۔اقوام متحدہ کے ہائی کمشنر برائے انسانی حقوق نے کہا کہ انسانی حقوق کا بین الاقوامی قانون بے ضرر آلات کے غلط استعمال پر پابندی لگاتا ہے۔
سلامتی کونسل کے اجلاس میں لبنانی وزیر خارجہ نے کہا کہ مواصلاتی آلات کے ذریعے حملوں کے بعد دنیا میں کوئی بھی محفوظ نہیں، ہم انتقام نہیں انصاف چاہتے ہیں۔واضح رہے کہ چند روز قبل لبنان میں حزب اللہ کے ارکان سمیت عام شہریوں کے زیر استعمال پیجر ڈیوائسز میں دھماکہ ہوا تھا جس کے نتیجے میں ایک درجن سے زائد افراد ہلاک اور 4 سے زائد زخمی ہوگئے تھے۔ حزب اللہ نے ان دھماکوں کا الزام اسرائیل پر عائد کیا تھا۔
