عالمی خبر رساں ادارے کے مطابق کینیڈاکے وزیر اعظم جسٹن ٹروڈو نے غزہ میں انسانی بنیادوں پر جنگ بندی کا مطالبہ کرتے ہوئے کہا ہے کہ انہیں شہریوں اور خاص طور پر بچوں پر جنگ کے تباہ کن اثرات پر گہری تشویش ہے۔
جسٹن ٹروڈو نے حماس پر زور دیا کہ وہ اسرائیلی یرغمالیوں کو فوری اور غیر مشروط طور پر رہا کرے۔ فریقین کو جنگ بندی کی راہ ہموار کرنے کے لیے مثبت اقدامات کرنے کی ضرورت ہے۔
کینیڈا کے وزیراعظم نے مزید کہا کہ اسرائیل کو اپنے دفاع کا حق حاصل ہے، ہم بھی اسے تسلیم کرتے ہیں لیکن اس کی قیمت فلسطینیوں کے قتل عام کی نہیں ہو سکتی۔
جسٹن ٹروڈو نے یہ بھی کہا کہ کینیڈ ا دیگر ممالک اور تنظیموں کے ساتھ مل کر شہریوں اور تمام غیر ملکی شہریوں کو جنگ کے علاقے سے محفوظ طریقے سے نکالنے کے لیے کام کر رہے ہیں۔
واضح رہے کہ 7 اکتوبر سے اب تک اسرائیل کی بمباری میں شہید ہونے والے فلسطینیوں کی تعداد 8 ہزار 800 سے تجاوز کر گئی ہے جب کہ 24 ہزار زخمی ہو چکے ہیں جن میں سے نصف بچے اور خواتین ہیں۔