اردوورلڈ کینیڈا( ویب نیوز)اسکردو انٹرنیشنل ایئرپورٹ بن گیا۔پی آئی اے کی پہلی بین الاقوامی پرواز پی کے 234 دبئی سے اسکردو پہنچ گئی۔ فلائٹ لینڈ ہونے کے بعد اسکردو کو انٹرنیشنل ایئرپورٹ کا درجہ مل گیا۔
ان پروازوں کے آغاز سے قومی ایئر لائن پی آئی اے نے ایک اور اعزاز حاصل کرتے ہوئے اسکردو کو پوری دنیا میں متعارف کرایا۔
بین الاقوامی پرواز کے ذریعے سیاح جنت نظیر گلگت بلتستان کے دلفریب نظاروں سے لطف اندوز ہو سکیں گے۔
پرواز کے دوران سیاحوں کو کے ٹو اور نانگا پربت سمیت برف پوش ہمالیائی پہاڑوں کے خوبصورت نظارے بھی دیکھنے کو ملیں گے۔ پی آئی اے کی دبئی سے سکردو کے لیے ہفتہ وار پروازیں پاکستان کے شمالی علاقوں میں سیاحت کے فروغ میں اہم کردار ادا کریں گی۔
سیاح اب دبئی سے ساڑھے تین گھنٹے کی براہ راست پرواز کے ذریعے سکردو پہنچ سکیں گے۔ اسکردو ایئرپورٹ پر ایک سادہ مگر شاندار تقریب کا اہتمام کیا گیا۔
مسافروں کا استقبال پی آئی اے کے چیف ایگزیکٹو آفیسر ایئر وائس مارشل عامر حیات، سول ایوی ایشن کے سینئر حکام اور دیگر سیاسی و سماجی شخصیات اور سرکاری حکام نے کیا۔
مسافروں میں گلگت بلتستان کی روایتی ٹوپیاں اور تحائف تقسیم کیے گئے۔ آمد پر ایئرپورٹ حکام کی جانب سے طیارے کو واٹر کینن کی سلامی بھی دی گئی۔ یوم آزادی کے موقع پر جہاز کے کپتان نے کاک پٹ کی کھڑکی کھول کر قومی پرچم لہرایا۔
