اردوورلڈ کینیڈا ( ویب نیوز)حساس اداروں نے اب ایف آئی اے کی مدد سے ڈالر ذخیرہ کرنے والے مافیا کے گھروں پر چھاپے مارنے کی تیاری کر لی ہے۔
سیکیورٹی ذرائع کے مطابق ڈالرز کی ذخیرہ اندوزی کے خلاف کریک ڈاؤن کا اگلا مرحلہ شروع کیا جا رہا ہے، جس میں اب ایف آئی اے اور حساس ادارے ذخیرہ شدہ ڈالر کی وصولی کے لیے گھروں پر چھاپے ماریں گے۔

ذرائع کے مطابق ایکسچینج کمپنیوں سے حاصل کردہ ڈیٹا کی مدد سے ملک بھر میں مکانات کی نشاندہی کی گئی ہے۔
ذرائع کے مطابق کریک ڈاؤن کے بعد حساس اداروں کو مافیاز کے گھروں میں ڈالر ذخیرہ کرنے والے اداروں کے بارے میں مستند معلومات ملی ہیں، حساس اداروں نے غیر معمولی تعداد میں ڈالر لینے والوں کی فہرست بھی حاصل کر لی ہے۔
ذرائع کے مطابق ایف آئی اے اور حساس ادارے گھروں پر ٹارگٹڈ چھاپے ماریں گے جس کے بعد گھروں میں ڈالر چھپانے والوں کو گرفتار کرکے جیل بھیج دیا جائے گا۔
واضح رہے کہ ڈالر مافیا کے خلاف جاری کریک ڈاؤن کے باعث ڈالر 31 روپے سستا ہو گیا ہے۔ یکم ستمبر کو ڈالر 328 روپے کی بلند ترین سطح پر بند ہوا جب کہ اوپن مارکیٹ میں بھی ڈالر کی قدر میں کمی ہوئی ہے۔ ڈالر 300 روپے سے نیچے آگیا۔