عالمی خبر رساں ادارے کے مطابق کینیڈا کے وزیراعظم جسٹن ٹروڈو ٹورنٹو کی ایک مسجد کے دورے پر پہنچے اور تقریر کرنا چاہتے تھے تاہم وہاں موجود نمازیوں نے ان کی اسرائیل نواز پالیسیوں کے خلاف نعرے بازی شروع کردی۔
نمازیوں نے کہا کہ پہلے اسرائیل سے جنگ بندی کا مطالبہ کریں، بچوں کی ہلاکتوں کی مذمت کریں اور پھر یہاں آئیں۔ نمازیوں کا غصہ دیکھ کر کینیڈین وزیراعظم جسٹن ٹروڈو اپنے سیکیورٹی اہلکاروں کے حصار میں واپس آگئے۔
عینی شاہدین کا کہنا ہے کہ کینیڈین وزیراعظم کو مسجد میں داخل ہوتے دیکھ کر وہاں موجود لوگ حیران رہ گئے اور وہ مسلسل اسرائیل کے خلاف نعرے لگا رہے تھے۔
مقامی میڈیا کے مطابق اس صورتحال کو دیکھتے ہوئے وزیراعظم جسٹن ٹروڈو نے واپس جانے کا فیصلہ کیا۔ ان کی روانگی کے بعد مقامی میڈیا سے گفتگو میں نمازیوں کا کہنا تھا کہ وزیراعظم کو کھل کر اسرائیل کی مذمت کرنی چاہیے تھی۔
