اردوورلڈ کینیڈا( ویب نیوز)وزیراعظم شہباز شریف نے اسرائیل اور حماس کے درمیان طے پانے والے غزہ امن معاہدے کا خیرمقدم کرتے ہوئے کہا ہے کہ یہ معاہدہ مشرقِ وسطیٰ میں دیرپا امن کے قیام کے لیے ایک تاریخی موقع فراہم کرتا ہے۔
سماجی رابطے کی ویب سائٹ ایکس پر جاری بیان میں وزیراعظم نے کہا کہ غزہ میں جاری نسل کشی کے خاتمے کے لیے ہونے والا یہ معاہدہ عالمی برادری کے مشترکہ عزم کا نتیجہ ہے۔ انہوں نے امریکی صدر اور ثالثی کرنے والے ممالک کی قیادت کو ان کی کوششوں پر خراجِ تحسین پیش کیا۔
وزیراعظم شہباز شریف نے کہا کہ مذاکراتی عمل کے دوران امریکی صدر کی قیادت نے عالمی امن کے فروغ کے لیے ان کے غیر متزلزل عزم کو اجاگر کیا ہے۔ انہوں نے قطر، مصر اور ترکیہ کی قیادت کو بھی ان کی مستقل سفارتی کوششوں پر سراہا، جن کی بدولت یہ معاہدہ ممکن ہوا۔
وزیراعظم نے فلسطینی عوام کی قربانیوں کو خراجِ تحسین پیش کرتے ہوئے کہا کہ انہوں نے جو مصائب برداشت کیے وہ ناقابلِ بیان ہیں اور دنیا کو یہ یقینی بنانا چاہیے کہ ایسے حالات دوبارہ پیدا نہ ہوں۔
The announcement of an agreement that will bring an end to the genocide in Gaza is a historic opportunity to secure lasting peace in the Middle East.
President Trump’s leadership throughout the process of dialogue and negotiations reflects his unwavering commitment to world…
— Shehbaz Sharif (@CMShehbaz) October 9, 2025
شہباز شریف نے مسجدِ اقصیٰ میں حالیہ اشتعال انگیزیوں کی شدید مذمت کرتے ہوئے کہا کہ عالمی برادری کو قابض قوتوں اور غیر قانونی آبادکاروں کو جوابدہ بنانا چاہیے۔ انہوں نے زور دیا کہ ایسے اقدامات سے گریز کیا جائے جو خطے میں امن قائم کرنے کی جاری کوششوں کو نقصان پہنچا سکتے ہیں۔
وزیراعظم نے اس عزم کا اظہار کیا کہ پاکستان اپنے دوست اور برادر ممالک کے ساتھ مل کر کام کرتا رہے گا تاکہ فلسطینی عوام کو امن، سلامتی اور باوقار زندگی اقوامِ متحدہ کی قراردادوں کے مطابق حاصل ہو سکے۔
