ishtiaq ahmed 
اردو ورلڈ کینیڈا ( ویب نیوز)وفاقی دارالحکومت کی عدالت نے پاکستان تحریک انصاف (پی ٹی آئی) کے رہنما شہباز گل کا 2 روزہ جسمانی ریمانڈ منظور کر لیا۔
شہباز گل کو اسلام آباد پولیس نے منگل کو بنی گالہ تھانے میں بغاوت پر اکسانے کے مقدمے میں گرفتار کیا تھا۔
پولیس نے سیاستدان کے 14 روزہ جسمانی ریمانڈ کی استدعا کی تھی جبکہ شہباز گل کے وکلاء نے پولیس کی درخواست کی مخالفت کرتے ہوئے موقف اختیار کیا تھا کہ پی ٹی آئی رہنما کو سیاسی بنیادوں پر گرفتار کیا گیا ہے۔
قبل ازیں وزیر داخلہ رانا ثناء اللہ نے کہا تھا کہ شہباز گل کو ریاست کی جانب سے ان کے خلاف درج مقدمے میں گرفتار کیا گیا ہے۔
منگل کو اسلام آباد میں وزیر اطلاعات و نشریات مریم اورنگزیب کے ہمراہ ایک پریس کانفرنس سے خطاب کرتے ہوئے انہوں نے کہا کہ یہ بات بالکل واضح ہے کہ شہباز گل نے ایک نجی ٹی وی چینل کے ساتھ مل کر مسلح افواج کو بدنام کرنے کے بیانیے کو فروغ دیا۔
انہوں نے کہا کہ غیر ملکی فنڈنگ اور توشہ خانہ کیسز میں پی ٹی آئی کی قیادت کے بے نقاب ہونے کے بعد سوشل میڈیا پر بدنیتی پر مبنی مہم چلائی گئی۔
رانا ثناء اللہ نے کہا کہ پورا اسکرپٹ پی ٹی آئی کے سربراہ عمران خان کی براہ راست نگرانی میں تیار کیا گیا۔ انہوں نے کہا کہ شہباز گل اور پی ٹی آئی رہنما چوہدری فواد حسین کو نجی ٹی وی چینل کے ذریعے اس بیانیے کو آگے بڑھانے کا کام سونپا گیا تھا۔
