اردو ورلڈ کینیڈا ( ویب نیوز )سعودی عرب میں حفظ، تلاوت اور تفسیر قرآن کے 26ویں سالانہ شاہ سلمان قرآن مقابلے میں شاندار کامیابی حاصل کرنے والے امیدواروں کے اعزاز میں ایک شاندار تقریب کا انعقاد کیا گیا۔
یہ تقریب دارالحکومت ریاض میں منعقد ہوئی اور اس میں ریاض ریجن کے گورنر شہزادہ فیصل بن بندر بن عبدالعزیز، اسلامی امور کے وزیر ڈاکٹر عبداللطیف آل الشیخ اور دیگر اہم شخصیات نے شرکت کی۔تقریب کے دوران کامیاب امیدواروں نے تلاوت کلام پاک کا شرف حاصل کیا۔ وزیر اسلامی امور ڈاکٹر عبداللطیف آل الشیخ نے اس موقع پر خادم حرمین شریفین شاہ سلمان بن عبدالعزیز کا شکریہ ادا کیا اور کہا کہ قرآن پاک انسانیت کے لیے بھلائی اور فلاح کی کتاب ہے، جس پر عمل کر کے مسلمان ہدایت اور کامیابی حاصل کر سکتے ہیں۔تقریب کے اختتام پر حفظ، تلاوت، اور تفسیر میں کامیاب ہونے والے امیدواروں میں 70 لاکھ ریال سے زائد کے انعامات تقسیم کیے گئے۔اس مقابلے کو سعودی عرب میں قرآن کریم کی ترویج و اشاعت کے لیے ایک اہم سنگ میل سمجھا جاتا ہے جس میں ہر سال دنیا بھر سے قرآنی علوم کے ماہرین شرکت کرتے ہیں۔
