اردوورلڈ کینیڈا ( ویب نیوز)پاکستان تحریک انصاف نے اعظم خان سے منسوب بیان پر ردعمل کا اظہار کرتے ہوئے کہا ہے کہ بیان بے بنیاد اور تضادات کا مجموعہ ہے۔
پی ٹی آئی کے مرکزی میڈیا ڈیپارٹمنٹ کی جانب سے جاری بیان میں کہا گیا ہے کہ گزشتہ ایک ماہ سے لاپتہ سابق پرنسپل سیکرٹری اعظم خان سے منسوب غیر مصدقہ بیان تضادات کا مجموعہ ہے۔ اعظم خان کے بیان کی سچائی ابھی سامنے نہیں آسکی لیکن یہ حقیقت ہے کہ وہ 17 جون سے لاپتہ ہوئے تھے
ترجمان کے مطابق لاپتہ شخص کا مجسٹریٹ کے سامنے 164 کا بیان قلمبند کرنا قانونی ماہرین کی نظر میں ناقابل فہم ہے۔ لاپتہ شخص کے مبینہ 164 بیان کے مندرجات کا غیر قانونی انکشاف اپنی نوعیت کا ایک الگ جرم ہے۔ اعظم خان کا مبینہ بیان "استحکام” یا "پارلیمینٹیرینز” یا پریس کلبوں سے برآمد ہونے والی گرفتاریوں کے سلسلے کی ایک کڑی معلوم ہوتا ہے۔
بیان میں کہا گیا ہے کہ پی ٹی آئی چیئرمین نے قوم کو واضح طور پر بتا دیا ہے کہ ملک میں جاری جبری گمشدگیوں اور غیر قانونی گرفتاریوں کے پیچھے اصل مقاصد کیا ہیں۔ انہوں نے قوم کو اس بات سے آگاہ کیا ہے کہ کس طرح انہیں سیاست سے بے دخل کرنے کے لیے طاقت اور جبر کے ذریعے "وعدہ معافی” کے گواہ پیش کرنے کی کوششیں جاری ہیں۔ جلد بازی اور مایوسی کے ساتھ میڈیا کو جاری کیا گیا "اسکرپٹ” ریاست کی سائفر پر پوزیشن کے لیے تباہ کن ہے۔
پی ٹی آئی کے ترجمان نے ایک بیان میں کہا کہ قومی سلامتی کمیٹی نے دو مختلف وزرائے اعظم (سابق اور موجودہ) کی زیرصدارت اجلاسوں میں سائفر کے مندرجات کی تصدیق کی ہے۔ قومی سلامتی کمیٹی کے دو الگ الگ اجلاسوں میں پوری سول اور عسکری قیادت نے اس بات کو ’’پاکستان کے اندرونی معاملات میں صریح مداخلت‘‘ قرار دیا۔
بیان میں کہا گیا ہے کہ اسی سائفر کی بنیاد پر اسلام آباد اور واشنگٹن میں امریکہ کی ڈیمارچ کی گئی۔ قومی سلامتی کمیٹی کے اجلاس سے قبل کابینہ کے ایک خصوصی اجلاس میں سائفر کا جائزہ لیا گیا اور اس کی درجہ بندی کی گئی۔ سپیکر قومی اسمبلی اور صدر مملکت نے معزز چیف جسٹس آف پاکستان کو اس حوالے سے جامع اور موثر تحقیقات کے لیے سفارشات پیش کیں۔
پی ٹی آئی کے جاری ردعمل کے مطابق، پی ٹی آئی کے چیئرمین نے پہلے وزیراعظم اور بعد میں ملک کی سب سے بڑی پارلیمانی اور عوامی پارٹی کے سربراہ کی حیثیت سے، سائفر کی اعلیٰ سطحی تحقیقات کا مطالبہ کیا۔
