اردو ورلڈ کینیڈا ( ویب نیوز ) آرمی چیف جنرل عاصم منیر نے کہا ہے کہ پاکستان دوقومی نظریے پر بنا، افواج پاکستان اور عوام ایک تھے، ایک ہیں اور ایک رہیں گے۔
پاکستان ملٹری اکیڈمی کاکول میں آزادی پریڈ کا انعقاد کیا گیا جس میں پاک فوج کے چاق و چوبند دستے نے مادر وطن کے شہداء کو خراج عقیدت پیش کیا۔آرمی چیف جنرل عاصم منیر آزادی پریڈ کے مہمان خصوصی تھے۔
تقریب سے خطاب کرتے ہوئے آرمی چیف نے کہا کہ قوم کو 76 واں یوم آزادی مبارک ہو، پاکستان دوقومی نظریہ کی بنیاد پر بنا اور آج مادر وطن کے دفاع کے عزم کی تجدید کا دن ہے۔انہوں نے کہا کہ ہم اندرونی اور بیرونی دشمنوں سے بخوبی واقف ہیں، ہمارا مشن پاکستان کو ایک خوشحال اور مستحکم ملک بنانا ہے، افواج پاکستان اور عوام ایک تھے، ایک ہیں اور ایک رہیں گے، ہم اس روایت کو برقرار رکھے ہوئے ہیں۔ 76 سال سے یوم آزادی منا رہے ہیں۔ آرمی چیف نے کہا کہ پاکستان بے شمار وسائل اور بے شمار نعمتوں سے مالا مال سرزمین ہے۔
جنرل عاصم منیر نے کہا کہ آج کا دن لا الہ الا اللہ کے پیغام کی روح کو سمجھنے پر زور دیتا ہے۔ ہمیں ناکام قوتوں کا سامنا ہے جو پاکستان کو کمزور کرنا چاہتی ہیں۔انہوں نے کہا کہ ہم قائداعظم کے اس قول پر سچے ہیں کہ ’’دنیا کی کوئی طاقت پاکستان کو مٹا نہیں سکتی‘‘۔ میں اس موقع پر اپنی عظیم قوم کو امید کا پیغام دے رہا ہوں۔ پاک فوج عوام کی فلاح و بہبود کے لیے پرعزم ہے۔
آرمی چیف نے کہا کہ قوم اور فوج میں دراڑ پیدا کرنے کی مذموم کوششیں ناکام ہوں گی۔
ہمیں جغرافیائی، سیاسی تنازعات، اقتدار کی جدوجہد جیسے چیلنجز کا سامنا ہے، قوم کو ان چیلنجز کا مقابلہ کرنے کا حوصلہ ہونا چاہیے چاہے وہ بیرونی ہوں یا اندرونی۔ صلاحیت اور قابلیت رکھتا ہے۔انہوں نے کہا کہ ہمیں خوف اور مایوسی پھیلانے والوں کے منفی پروپیگنڈے کو مسترد کرنا ہوگا، یہ عناصر معاشرے میں مایوسی پھیلانے کی ناکام کوششوں میں سرگرم ہیں، چیلنجز کا سامنا کیے بغیر کوئی ملک و قوم ترقی نہیں کر سکتی۔تقریب میں ملی نغمے پیش کیے گئے اور اختتام پر آتش بازی کا شاندار مظاہرہ کیا گیا۔
