پاکستان تحریک انصاف کے ذرائع کا کہنا ہے کہ انٹرا پارٹی الیکشن ہفتے کو ہوں گے جس میں چیئرمین سمیت تمام عہدوں کا انتخاب کیا جائے گا۔
ذرائع کا کہنا ہے کہ عمران خان انٹرا پارٹی الیکشن میں حصہ نہیں لیں گے اور ان کی بہن بھی پارٹی چیئرمین شپ کی امیدوار نہیں ہیں۔
دوسری جانب ذرائع کا کہنا ہے کہ پی ٹی آئی کے نئے چیئرمین کے لیے حامد خان اور بیرسٹر گوہر خان کے ناموں پر غور کیا جا رہا ہے اور حتمی اعلان کل تک کر دیا جائے گا۔
واضح رہے کہ 20 نومبر کو الیکشن کمیشن نے پی ٹی آئی کے انٹرا پارٹی الیکشن کو غیر شفاف قرار دیتے ہوئے 20 روز میں دوبارہ انتخابات کرانے کا حکم دیا تھا۔ کمیشن نے ہدایت کی کہ پی ٹی آئی کے انٹرا پارٹی انتخابات کی رپورٹ الیکشن کرانے کے بعد 7 روز میں کمیشن کو پیش کی جائے۔
الیکشن کمیشن نے ہدایت کی تھی کہ 20 دن میں انٹرا پارٹی انتخابات کرائے جائیں، تب تک بلے کا نشان پی ٹی آئی کے پاس رہے گا، ورنہ واپس لے لیا جائے گا۔
