اردو ورلڈ کینیڈا ( ویب نیوز )صدر مملکت ڈاکٹر عارف علوی نے فنانس (ضمنی) بل 2023 کی منظوری دے دی۔
صدر مملکت نے آئین کے آرٹیکل 75 کے تحت فنانس بل 2023 کی منظوری دے دی۔
واضح رہے کہ پیر کی شام قومی اسمبلی میں مالیاتی قانون اپوزیشن ارکان کی موجودگی میں کثرت رائے سے منظور کیا گیا، جسے وفاقی وزیر خزانہ اسحاق ڈار نے پیش کیا۔
قومی اسمبلی میں منظوری کے بعد فنانس سپلیمنٹری بل 2023 منظوری کے لیے ایوان صدر بھیج دیا گیا۔
اس حوالے سے وزیر خزانہ اسحاق ڈار نے صدر مملکت ڈاکٹر عارف علوی سے ملاقات کی جس میں انہوں نے یقین دہانی کرائی کہ بل کی منظوری اور اس کے ایکٹ بننے میں تاخیر نہیں کی جائے گی۔
بین الاقوامی مالیاتی فنڈ کے رکے ہوئے بیل آؤٹ پروگرام کو بحال کرنے کے لیے اس بل میں 170 ارب روپے کے نئے ٹیکس شامل ہیں، اسے جلد از جلد فنانس ایکٹ میں تبدیل کرنے کی ضرورت ہے۔
بل کے نفاذ کے تناظر میں آئی ایم ایف کے ساتھ عملے کی سطح کے معاہدے پر اگلے ہفتے دستخط کیے جائیں گے۔
وزیر خزانہ اسحاق ڈار پر امید ہیں کہ حکومت اور آئی ایم ایف کے اقدامات سے ملکی معیشت تیزی سے سنبھلنا شروع ہو جائے گی۔
