اردو ورلڈ کینیڈا ( ویب نیوز )بھارت کے یوم آزادی پر مقبوضہ کشمیر میں یوم سیاہ منایا جا رہا ہے۔

کشمیری میڈیا کے مطابق حریت قیادت کی کال پر مقبوضہ وادی میں مکمل ہڑتال ہے۔ تعلیمی ادارے، دکانیں اور کاروباری مراکز بند اور ٹرانسپورٹ معطل ہے۔

کشمیریوں نے بھارتی مظالم اور غاصبانہ قبضے کے خلاف اپنے گھروں پر سیاہ پرچم لہرا دئیے۔قابض بھارتی فورسز نے کشمیریوں کو احتجاج سے روکنے کے لیے اضافی نفری تعینات کر دی ہے۔ مرکزی شاہراہوں کو خاردار تاریں لگا کر بند کر دیا گیا ہے۔ مختلف علاقوں میں موبائل اور انٹرنیٹ سروس بند کردی گئی ہے۔ کئی نوجوانوں کو گرفتار کیا گیا ہے۔
کشمیر کی آزادی کے لیے آواز اٹھانے والے یاسین ملک، آسیہ اندرابی اور دیگر رہنما برسوں سے بھارتی جیلوں میں بدترین مظالم کا سامنا کر رہے ہیں۔ بھارت کے قبضے سے آزادی کے لیے ایک لاکھ سے زائد کشمیری اپنی جانوں کا نذرانہ پیش کر چکے ہیں۔