اردو ورلڈ کینیڈا ( ویب نیوز )وفاقی وزیر قانون نذیر تارڑ نے نیب رولز میں ترمیم سے متعلق عمران خان کے بیان کو جھوٹ کا پلندہ قرار دے دیا
ایک بیان میں اعظم نذیر تارڑ نے کہا کہ نیب ترامیم عمران خان کا اپنا قانون تھا اور 80 فیصد ترامیم وہ لائے تھے، موجودہ حکومت نے صرف پارلیمنٹ میں قانون بنایا۔
انہوں نے کہا کہ عمران خان اس معاملے پر عدالت سے رجوع کر چکے ہیں، اس لیے سیاسی بیان بازی سے گریز کریں اور فیصلہ عدالت پر چھوڑ دیں۔
اعظم نذیر تارڑ نے کہا کہ ہم عدالت میں ان ترامیم کا بھرپور دفاع کریں گے، ترامیم اسلامی شریعت، آئین اور پاکستانی قوانین کے مطابق ہیں۔
انہوں نے مزید کہا کہ ہم نے سرکاری ملازمین کو تحفظ فراہم کیا تاکہ وہ نیب کی بلیک میلنگ کے بغیر خدمات انجام دے سکیں۔
واضح رہے کہ سابق وزیراعظم عمران خان نے حکومت کی جانب سے منظور کی گئی نیب ترامیم کو سپریم کورٹ میں چیلنج کیا ہے
