اردوورلڈکینیڈا(ویب نیوز)کینیڈا کی عالمی شہرت یافتہ گلوکارہ سیلین ڈیون کو منفرد انداز میں خراجِ تحسین پیش کرنے کے لیے ان کے مشہور لباس سے متاثر ہوکر خصوصی باربی ڈول متعارف کرا دی گئی ہے۔
یہ گڑیا گلوکارہ کے 1998 میں آسکرز کی تقریب میں پہنے گئے لباس کی نقل ہے، جس میں ان کے مداحوں کے لیے کئی یادگار تفصیلات شامل کی گئی ہیں۔
امریکی کھلونا ساز کمپنی میٹل کی جانب سے متعارف کرائی گئی اس خصوصی گڑیا میں سیلین ڈیون کو گہرے نیلے رنگ کے لمبے لباس میں دکھایا گیا ہے۔
اس لباس کا انداز وہی ہے جو گلوکارہ نے 1998 کے اکیڈمی ایوارڈز میں اپنے مشہور گیت ’’مائی ہارٹ ول گو آن‘‘ کی پرفارمنس کے دوران اختیار کیا تھا۔
یہ گیت مشہور فلم ’’ٹائی ٹینک‘‘ کا حصہ تھا اور اس نے دنیا بھر میں غیر معمولی مقبولیت حاصل کی۔ گڑیا کے لباس کے ساتھ نیلے ہیرے کی شکل کے دل سے متاثر ہار بھی شامل ہے، جو فلم میں دکھائے گئے مشہور زیور ’’ہارٹ آف دی اوشن‘‘ کی یاد دلاتا ہے۔
مداحوں کے لیے خصوصی تحفہ
سیلین ڈیون نے اس اعزاز پر خوشی کا اظہار کرتے ہوئے کہا کہ ان کے کیریئر کے اہم ترین لمحات میں سے ایک سے متاثر ہوکر گڑیا تیار کیا جانا ان کے لیے اعزاز کی بات ہے۔ ان کے مطابق یہ یادگار لوگوں کو خود اعتمادی اور اپنے منفرد انداز کے اظہار کی ترغیب دے سکتی ہے۔
یہ گڑیا میٹل کی باربی سگنیچر سیریز کا حصہ ہے، جس میں معروف شخصیات اور موسیقی کی دنیا کے نمایاں ناموں سے متاثر ہوکر خصوصی کلیکشن تیار کیے جاتے ہیں۔
سیلین ڈیون کے لیے یہ اعزاز ایسے وقت میں سامنے آیا ہے جب وہ طویل وقفے کے بعد دوبارہ اسٹیج پر واپسی کے باعث بھی خبروں میں ہیں۔ گلوکارہ نے 2022 میں بتایا تھا کہ وہ ایک نایاب اعصابی بیماری کا شکار ہیں، جس کے باعث ان کی نقل و حرکت اور گانے کی صلاحیت متاثر ہوئی تھی۔ بعد ازاں انہوں نے عوامی تقریبات اور موسیقی کے پروگراموں میں دوبارہ شرکت شروع کی۔
ان کی یادگار پرفارمنس سے متاثر ہوکر تیار کی گئی یہ گڑیا ان کے مداحوں کے لیے محض ایک کھلونا نہیں بلکہ ان کے موسیقی کے سفر اور فیشن کی تاریخ کے ایک اہم لمحے کی یادگار بھی ہے
