اردوورلڈکینیڈا(ویب نیوز)سنگاپور میں ویپ اور ای سگریٹ کے خلاف حکومتی کارروائیاں مزید تیز کردی گئی ہیں، جہاں رواں سال اپریل سے جون کے دوران 2,428 افراد کو ویپ رکھنے اور استعمال کرنے پر پکڑا گیا۔ حکام کے مطابق کارروائی کے باوجود ویپنگ کے خلاف نگرانی اور نفاذِ قانون کا سلسلہ جاری رہے گا۔
سنگاپور کی وزارت صحت اور ہیلتھ سائنسز اتھارٹی کے مطابق یکم اپریل سے 30 جون 2026 کے درمیان پکڑے جانے والے افراد میں 1,971 افراد، یعنی 81 فیصد، عام ویپ کے کیسز میں جبکہ 457 افراد ایٹو میڈیٹ والے ویپ کے استعمال یا رکھنے پر کارروائی کی زد میں آئے۔
ماہانہ 809 کیسز سامنے آئے
حکام کے مطابق رواں سال کی دوسری سہ ماہی کے دوران ویپنگ کے خلاف کارروائی میں اوسطاً 809 کیسز ہر ماہ سامنے آئے۔
یہ تعداد جون سے اگست 2025 کے دوران ریکارڈ کیے گئے ماہانہ اوسط 1,219 کیسز کے مقابلے میں تقریباً 30 فیصد کم ہے۔ حکام کے مطابق گزشتہ سال یکم ستمبر سے ویپنگ کے خلاف سخت اقدامات نافذ کیے جانے کے بعد مجموعی طور پر کیسز میں کمی دیکھی گئی ہے۔
3,900 سے زائد ویپ ضبط
سنگاپور نے ویپ کی غیر قانونی درآمد روکنے کے لیے اپنے ہوائی، زمینی اور سمندری چیک پوائنٹس پر بھی نگرانی سخت کر رکھی ہے۔اپریل سے جون کے دوران چیک پوائنٹس سے 3,900 سے زائد ویپ اور ان سے متعلقہ اجزا ضبط کیے گئے۔اسی عرصے میں عام ویپ درآمد کرنے کی کوشش کرنے والے 19 افراد کا بھی سراغ لگایا گیا۔ ان میں سے ایک کے خلاف مقدمہ چلایا گیا جبکہ 8 افراد کے خلاف تحقیقات جاری ہیں، جب کہ دیگر کے خلاف جرمانے یا سخت وارننگ کی کارروائی کی گئی۔
ایٹو میڈیٹ والے ویپ بھی نشانے پر
حکام نے ایٹو میڈیٹ والے ویپ کے خلاف بھی سخت کارروائی کی ہے۔ اپریل سے جون کے دوران 9 افراد پر ایٹو میڈیٹ والے ویپ درآمد کرنے یا سپلائی کرنے کے الزام میں مقدمات قائم کیے گئے۔
یہ بھی پڑھیں :سنگاپور میں بگ بینگ کا جنون، کنسرٹ ٹکٹوں کی آن لائن قطار 3 لاکھ سے تجاوز کرگئی
حکام کے مطابق ان میں سے 6 افراد کے ایک بین الاقوامی گروہ کا حصہ ہونے کا شبہ ہے اور ان سے 8 لاکھ 80 ہزار سنگاپورین ڈالر سے زائد مالیت کے ایٹو میڈیٹ ویپ پوڈز ضبط کیے گئے۔اسی عرصے میں ایٹو میڈیٹ والے ویپ فروخت کرنے کے الزام میں 14 افراد کو سزا بھی سنائی گئی۔
آن لائن فروخت بھی بند
سنگاپور حکام نے ویپ کی آن لائن فروخت اور تشہیر کے خلاف بھی کارروائی کی۔اپریل سے جون کے دوران ای کامرس اور سوشل میڈیا پلیٹ فارمز کے ساتھ مل کر 600 سے زائد آن لائن لسٹنگز ہٹائی گئیں جن میں ویپ اور اس سے متعلقہ اجزا فروخت کیے جارہے تھے۔
حکام کا کہنا ہے کہ ویپنگ کی روک تھام کے لیے صرف سڑکوں اور عوامی مقامات پر کارروائی کافی نہیں، بلکہ آن لائن دستیابی اور غیر قانونی سپلائی کو بھی روکنا ضروری ہے۔
245 طلبہ بھی کارروائی کی زد میں
ویپنگ کے خلاف کارروائی میں نوجوانوں پر بھی خصوصی توجہ دی جارہی ہے۔اپریل سے جون کے دوران اسکولوں اور اعلیٰ تعلیمی اداروں کی جانب سے 245 طلبہ کو ہیلتھ سائنسز اتھارٹی کے حوالے کیا گیا۔اسی مدت میں 480 سے زائد نوجوانوں نے سگریٹ نوشی اور ویپنگ چھوڑنے کے لیے کونسلنگ حاصل کی۔حکام کے مطابق مقصد صرف جرمانہ عائد کرنا نہیں بلکہ نوجوانوں کو ویپنگ کی عادت سے چھٹکارا دلانے کے لیے بحالی اور معاونت بھی فراہم کرنا ہے۔
264 افراد بحالی پروگرام میں شامل
حکام کے مطابق دوسری سہ ماہی کے دوران 264 افراد کو بحالی پروگرامز میں شامل کیا گیا۔ستمبر 2025 میں سخت کارروائی شروع کیے جانے کے بعد مجموعی طور پر 787 افراد کو ایسے پروگرامز میں شامل کیا جاچکا ہے، جن میں سے 245 افراد اپنا بحالی پروگرام کامیابی سے مکمل کرچکے ہیں۔
ایٹو میڈیٹ سے متعلق بار بار خلاف ورزی کرنے والے افراد کے خلاف بھی سخت کارروائی کی جارہی ہے۔ اپریل سے جون کے دوران 18 افراد کو ڈرگ ری ہیبلیٹیشن سینٹر بھیجا گیا۔
QuitVape پروگرام بھی ختم ہوگا
سنگاپور حکومت نے ایٹو میڈیٹ کے استعمال سے نجات کے لیے شروع کیا گیا QuitVape پروگرام یکم ستمبر 2026 سے ختم کرنے کا فیصلہ کیا ہے۔
حکام کے مطابق اس پروگرام میں لوگوں کی شرکت اب محدود ہوگئی ہے، تاہم جو افراد پروگرام کے خاتمے سے پہلے اس میں شامل ہوچکے ہیں، انہیں اپنی بحالی اور معاونت مکمل کرنے کا موقع دیا جائے گا۔
سنگاپور میں ویپنگ کے خلاف تازہ کارروائی سے واضح ہوتا ہے کہ حکومت اس معاملے کو صرف ایک عام خلاف ورزی کے طور پر نہیں دیکھ رہی بلکہ غیر قانونی درآمد، آن لائن فروخت، نوجوانوں میں استعمال اور ایٹو میڈیٹ جیسے مادوں سے متعلق ویپنگ کے خلاف بیک وقت کارروائی کررہی ہے۔
