اردوورلڈ کینیڈا( ویب نیوز)وزیر اعظم شہباز شریف نے خیبر پختونخوا کے سیلاب متاثرین کی مدد کے لیے وفاقی کابینہ کی ایک ماہ کی تنخواہ عطیہ کرنے کا اعلان کیا ہے۔ وزیر اعظم کی زیر صدارت اجلاس میں سیلاب متاثرہ اضلاع میں جاری امدادی سرگرمیوں کا جائزہ لیا گیا اور وفاقی اداروں کو امدادی کارروائیوں میں مزید فعال ہونے کی ہدایت دی گئی۔
وزیر اعظم نے کہا کہ مصیبت کی اس گھڑی میں سیاست کو پسِ پشت ڈال کر عوام کی خدمت پر توجہ دینی ہوگی۔ سیلاب سے متاثرہ اضلاع میں معاوضے کے پیکیج کو دوگنا کیا گیا ہے اور متاثرین کو چیکس کی تقسیم آج سے شروع کی جائے گی۔
اجلاس میں فیصلہ کیا گیا کہ وزیرِ امور کشمیر امدادی اشیا کی تقسیم اور بحالی کے آپریشن کی نگرانی کریں گے جبکہ بجلی، پانی اور سڑکوں کی بحالی کی ذمہ داری وفاقی وزراء کو دی گئی ہے۔ متعلقہ وزراء کو ہدایت کی گئی کہ وہ خود متاثرہ علاقوں کا دورہ کریں اور این ایچ اے صوبائی یا قومی شاہراہوں میں تخصیص نہ کرے تاکہ امدادی راستے کھلے رہیں۔
وزیراعظم نے مزید کہا کہ وزیر بجلی سیلاب متاثرہ علاقوں کا معائنہ کریں، این ڈی ایم اے فوری طور پر نقصانات کا حتمی جائزہ پیش کرے، اور امدادی اشیا کی تقسیم کا لائحہ عمل مرتب کرے۔ وزارت خزانہ کو ہدایت کی گئی کہ این ڈی ایم اے کو ضروری وسائل فراہم کیے جائیں تاکہ امداد آخری شخص تک پہنچ سکے اور بنیادی انفراسٹرکچر جلد بحال ہو۔
وزارت صحت کو بھی ہدایت دی گئی کہ وہ ادویات اور ڈاکٹرز کی ٹیمیں خیبر پختونخوا بھیجے اور کیمپس قائم کرے جبکہ بینظیر انکم سپورٹ پروگرام کو متاثرین کی مدد کے لیے فعال کیا جائے۔
