اردو ورلڈ کینیڈا ( ویب نیوز ) چیئرمین سی ڈی اے محمد علی رندھاوا نے کہا ہے کہ فی الحال اسلام آباد میں اسٹیڈیم بنانے کا کوئی ارادہ نہیں ہے۔
چیئرمین سی ڈی اے کا کہنا تھا کہ اسلام آباد میں کرکٹ اسٹیڈیم بنانے کا ابھی کوئی منصوبہ نہیں ہے تاہم شہر میں 25 کرکٹ اور 25 فٹبال گراؤنڈ بنائے جائیں گے۔انہوں نے کہا کہ اسلام آباد میں کرکٹ اسٹیڈیم بنانے کے حوالے سے پی سی بی سے میٹنگ ہوئی ہے۔ ماہرین سے مشاورت کے بعد دیکھیں گے کہ اسلام آباد میں کرکٹ اسٹیڈیم کہاں بنایا جائے۔ ماہرین اسٹیڈیم کی تعمیر کے لیے جگہ کا انتخاب کریں گے۔چیئرمین سی ڈی اے نے کہا کہ اسلام آباد میں کرکٹ گراؤنڈز کی موجودہ حالت ابتر ہے اور کرکٹ گراؤنڈز کی پچز کو بین الاقوامی معیار کے مطابق بنانے کی ضرورت ہے۔محمد علی رندھاوا کا مزید کہنا تھا کہ اسلام آباد میں مختلف کھیلوں کے گراؤنڈز بنانے کا منصوبہ ہے اور ایف نائن پارک کے گراؤنڈ کو اپ گریڈ کرنے کے لیے راشد لطیف کی مدد لی گئی ہے۔واضح رہے کہ اس سے قبل خبریں سامنے آئی تھیں کہ سی ڈی اے نے اسلام آباد کے ایف نائن پارک میں اسٹیڈیم بنانے کا فیصلہ کیا ہے۔ تاہم اس حوالے سے شدید ردعمل سامنے آنے کے بعد سی ڈی اے نے بعد میں وضاحت جاری کی تھی کہ پارک میں نیا اسٹیڈیم بنانے کا کوئی منصوبہ نہیں ہے۔
