اردو ورلڈ کینیڈا ( ویب نیوز ) جنوبی افریقا نے اسرائیل کے اعلیٰ سفارتکار آریل سیڈمین کو ناپسندیدہ شخصیت قرار دیتے ہوئے 72 گھنٹوں کے اندر ملک چھوڑنے کا حکم دے دیا ہے۔
یہ فیصلہ دونوں ممالک کے درمیان پہلے سے موجود شدید سفارتی کشیدگی میں مزید اضافے کا سبب بن گیا ہے۔عالمی خبر رساں اداروں کے مطابق جنوبی افریقا کی وزارتِ خارجہ نے اس فیصلے کا اعلان ایک خصوصی بیان کے ذریعے کیا، جس میں کہا گیا کہ یہ اقدام ایسے غیرمعمولی اور ناقابل قبول واقعات کے بعد اٹھایا گیا ہے جنہوں نے دوطرفہ سفارتی اصولوں، باہمی اعتماد اور جنوبی افریقا کی خودمختاری کو نقصان پہنچایا۔وزارتِ خارجہ کے بیان میں کہا گیا کہ اسرائیلی سفارتکار آریل سیڈمین نے سرکاری اسرائیلی سوشل میڈیا اکاؤنٹس کے ذریعے جنوبی افریقا کے صدر سِریل راما فوسا کے خلاف توہین آمیز اور غیرسفارتی زبان استعمال کی، جو کسی بھی صورت قابلِ قبول نہیں۔ بیان کے مطابق ایسے بیانات سفارتی تعلقات کے بنیادی اصولوں کے منافی ہیں۔
مزید بتایا گیا کہ آریل سیڈمین نے جنوبی افریقا میں اپنے مختلف دوروں اور سرگرمیوں سے متعلق اپنے اعلیٰ حکام اور متعلقہ سفارتی فورمز کو بروقت آگاہ نہیں کیا، جسے سفارتی آداب اور ویانا کنونشن کی صریح خلاف ورزی قرار دیا گیا ہے۔جنوبی افریقا کی وزارتِ خارجہ نے واضح کیا کہ مذکورہ سفارتکار کے اقدامات نے اعتماد، احترام اور بنیادی سفارتی پروٹوکول کو شدید نقصان پہنچایا ہے، اس لیے حکومت کے پاس سخت اقدام کے سوا کوئی اور راستہ نہیں بچا تھا۔بیان میں اسرائیلی حکومت سے مطالبہ کیا گیا کہ وہ آئندہ اپنے سفارتی نمائندوں کے طرزِ عمل میں احترام، ذمہ داری اور بین الاقوامی قوانین کی مکمل پاسداری کو یقینی بنائے۔
دوسری جانب اسرائیل نے اس فیصلے کے جواب میں روایتی سخت ردِعمل کا مظاہرہ کرتے ہوئے جنوبی افریقا کے سفارتکار شاہان ایڈورڈ بائنیویلڈٹ کو بھی ملک چھوڑنے کا حکم دے دیا ہے، جس سے دونوں ممالک کے تعلقات مزید تناؤ کا شکار ہو گئے ہیں۔واضح رہے کہ جنوبی افریقا اور اسرائیل کے درمیان تعلقات پہلے ہی خاصے کشیدہ ہیں۔ جنوبی افریقا نے غزہ میں جاری اسرائیلی کارروائیوں کو نسل کشی قرار دیتے ہوئے عدالتِ بین الاقوامی انصاف میں اسرائیل کے خلاف مقدمہ دائر کر رکھا ہے، جسے اسرائیل مسلسل بے بنیاد الزامات قرار دیتا رہا ہے۔جنوبی افریقا طویل عرصے سے فلسطینی عوام کی حمایت کرتا آیا ہے اور غزہ میں انسانی حقوق کی مبینہ خلاف ورزیوں پر اسرائیل پر شدید تنقید کرتا رہا ہے، جبکہ اسرائیل ان تمام الزامات کو مسترد کرتا ہے۔سفارتی ماہرین کے مطابق حالیہ پیش رفت خطے میں سفارتی محاذ آرائی کو مزید پیچیدہ بنا سکتی ہے اور دونوں ممالک کے تعلقات کی بحالی فوری طور پر ممکن نظر نہیں آتی۔
