اردوورلڈکینیڈا(ویب نیوز)سوشل میڈیا پر چند دنوں سے گردش کرنے والی افواہوں کے مطابق بالی ووڈ سپر اسٹار سلمان خان فلم ’دھورندھر 2‘ میں ’’بڑے صاحب‘‘ کے کردار میں نظر آئیں گے، جس نے مداحوں میں شدید جوش و خروش پیدا کر دیا تھا۔ کچھ صارفین نے قیاس آرائی کی تھی کہ یہ کردار ممکنہ طور پر کسی طاقتور انڈر ورلڈ ڈان سے متاثر ہو سکتا ہے۔
تاہم تازہ ترین رپورٹس میں واضح کیا گیا ہے کہ وائرل تصاویر مکمل طور پر اے آئی (مصنوعی ذہانت) سے تیار کی گئی ہیں اور ان کا حقیقت سے کوئی تعلق نہیں۔ ہندوستان ٹائمز کے مطابق جیو اسٹوڈیوز، بی 62 اسٹوڈیوز اور فلم کے ہدایت کار آدتیہ دھر نے بھی سلمان خان کی اس پروجیکٹ میں شمولیت کی کوئی تصدیق نہیں کی۔
اگرچہ تصاویر حقیقت پر مبنی نہیں ہیں، مداحوں کی دلچسپی برقرار ہے اور سوشل میڈیا پر تبصرے جاری ہیں۔ ایک صارف نے لکھا، ’’اب آئے گا مزہ۔‘‘ دوسرے نے کہا، ’’وہ اس کردار پر راج کریں گے۔‘‘ ایک اور مداح نے تبصرہ کیا، ’’یہ تو اے آئی ہے، لیکن اگر بھائی بڑے صاحب بن گئے تو باکس آفس کا کیا حال ہوگا، اندازہ ہی نہیں۔‘‘
فلم ’دھورندھر: دی ریونج‘ کی بات کریں تو یہ 19 مارچ 2027 کو سینما گھروں میں ریلیز کی جائے گی اور ہندی کے ساتھ ساتھ تیلگو، تمل، کنڑ اور ملیالم زبانوں میں بھی پیش کی جائے گی۔
