اردو ورلڈ کینیڈا ( ویب نیوز ) مقبوضہ مغربی کنارہ میں اسرائیلی فوج کی فائرنگ کے نتیجے میں ایک ہی خاندان کے چار افراد شہید جبکہ دو بچے زخمی ہو گئے۔
فلسطینی حکام کے مطابق شہید ہونے والوں میں ماں باپ اور ان کے دو کمسن بیٹے شامل ہیں جن کی عمریں تقریباً 5 اور 7 سال بتائی جا رہی ہیں۔فلسطینی ذرائع کا کہنا ہے کہ یہ واقعہ اس وقت پیش آیا جب ایک گاڑی علاقے سے گزر رہی تھی اور اسرائیلی دفاعی افواج کے اہلکاروں نے اس پر فائرنگ کر دی۔ فائرنگ کے نتیجے میں گاڑی میں سوار خاندان کے چار افراد موقع پر ہی شہید ہو گئے جبکہ دو بچے زخمی ہو گئے جن کی عمریں 8 اور 11 سال بتائی جاتی ہیں۔ زخمی بچوں کو فوری طور پر قریبی اسپتال منتقل کر دیا گیا جہاں انہیں طبی امداد دی جا رہی ہے۔
فلسطینی حکام نے واقعے کی شدید مذمت کرتے ہوئے کہا ہے کہ شہریوں کو نشانہ بنانا بین الاقوامی قوانین کی کھلی خلاف ورزی ہے۔ ان کا کہنا ہے کہ اس واقعے میں معصوم بچوں کی ہلاکت انسانی حقوق کی سنگین پامالی ہے۔دوسری جانب اسرائیلی دفاعی افواج کا کہنا ہے کہ فوجیوں نے اس وقت فائرنگ کی جب مبینہ طور پر گاڑی تیزی سے فوجی اہلکاروں کی جانب بڑھ رہی تھی اور اسے ممکنہ خطرہ سمجھا گیا۔ فوج کے مطابق واقعے کی مزید تحقیقات کی جا رہی ہیں۔
ادھر غزہ پٹی میں بھی کشیدگی برقرار ہے۔ اطلاعات کے مطابق اسرائیلی فضائیہ نے فلسطینی پولیس کی ایک گاڑی کو نشانہ بنایا جس کے نتیجے میں کم از کم آٹھ افراد شہید ہو گئے۔ فلسطینی حکام کا کہنا ہے کہ یہ حملہ شہری علاقے میں کیا گیا جس سے جانی نقصان میں اضافہ ہوا۔خطے میں بڑھتی ہوئی کشیدگی کے باعث انسانی حقوق کی تنظیموں اور عالمی برادری کی جانب سے تشویش کا اظہار کیا جا رہا ہے اور فریقین سے تحمل کا مظاہرہ کرنے کی اپیل کی جا رہی ہے۔
