اردو ورلڈ کینیڈا ( ویب نیوز ) کینیڈا کی وفاقی حکومت نے ملک میں خلائی شعبے کو فروغ دینے کے لیے بڑا قدم اٹھاتے ہوئے نووا سکوشیا میں خلائی لانچ پیڈ کے قیام کے لیے 200 ملین ڈالر مختص کرنے کا اعلان کیا ہے۔
اس منصوبے کا مقصد کینیڈا کو مستقبل میں اپنے سیٹلائٹس خود خلا میں بھیجنے کے قابل بنانا ہے۔حکام کے مطابق یہ سرمایہ کاری آئندہ دس سالوں کے دوران مرحلہ وار استعمال کی جائے گی۔ منصوبے کے تحت کینسو، نووا سکوشیا کے قریب ایک خلائی لانچ پیڈ لیز پر حاصل کیا جائے گا، جو مستقبل میں کینیڈا کے پہلے باقاعدہ خلائی اڈے کی بنیاد بنے گا۔
اس منصوبے کا اعلان ڈیوڈ میک گینٹی نے اوٹاوا میں کینیڈین اسپیس ایجنسی کی لیبارٹری سے کیا۔ انہوں نے کہا کہ یہ اقدام نہ صرف خلائی تحقیق بلکہ ملکی دفاعی اور ٹیکنالوجی کے شعبوں کو بھی مضبوط کرے گا۔فی الحال کینیڈا کے پاس اپنے سیٹلائٹس خلا میں بھیجنے کی مکمل صلاحیت موجود نہیں، جس کے باعث اسے ماضی میں امریکا پر انحصار کرنا پڑتا رہا ہے۔ تاہم اس نئے منصوبے کے ذریعے ملک اپنی خودمختار خلائی لانچنگ صلاحیت حاصل کرنے کی جانب اہم پیش رفت کرے گا۔
یہ اقدام لبرل حکومت کی وسیع تر حکمت عملی کا حصہ ہے، جس کا مقصد ملکی دفاعی صنعت کو مضبوط بنانا اور جدید ٹیکنالوجی کے شعبوں میں خود کفالت حاصل کرنا ہے۔ اس سے قبل 2025 کے بجٹ میں بھی کینیڈا کی خلائی صلاحیتوں کو بڑھانے کے لیے آئندہ تین سالوں میں 183 ملین ڈالر مختص کیے جا چکے ہیں۔ماہرین کے مطابق اس منصوبے سے نہ صرف کینیڈا کے خلائی پروگرام کو تقویت ملے گی بلکہ مقامی معیشت، روزگار اور جدید سائنسی تحقیق کے مواقع بھی بڑھیں گے، جس سے ملک عالمی خلائی دوڑ میں اپنی پوزیشن مضبوط کر سکے گا۔
