اردو ورلڈ کینیڈا ( ویب نیوز ) مشرقِ وسطیٰ میں بڑھتی ہوئی کشیدگی کے دوران ایران کے حملوں کے بعد امریکا کی فوج کو غیر معمولی حالات کا سامنا ہے

جہاں متعدد فوجی اہلکار روایتی اڈوں کے بجائے ہوٹلوں اور عارضی دفاتر سے اپنی ذمہ داریاں انجام دینے پر مجبور ہو گئے ہیں۔امریکی میڈیا رپورٹس کے مطابق حالیہ حملوں میں خطے میں قائم امریکی فوج کے کم از کم 13 اڈوں کو شدید نقصان پہنچا، جس کے باعث کئی تنصیبات ناقابلِ رہائش ہو چکی ہیں۔ ان اڈوں پر موجود بنیادی سہولیات متاثر ہونے کے باعث فوجی اہلکاروں کو متبادل انتظامات اختیار کرنا پڑے۔
رپورٹ میں بتایا گیا ہے کہ متاثرہ اڈوں میں سے کویت میں واقع امریکی فوجی اڈہ سب سے زیادہ متاثر ہوا، جہاں انفراسٹرکچر کو نمایاں نقصان پہنچا۔ اس صورتحال کے پیش نظر بڑی تعداد میں فوجی اہلکاروں کو قریبی ہوٹلوں اور دفتری عمارتوں میں منتقل کر دیا گیا ہے۔ذرائع کے مطابق اب کئی فوجی سرگرمیاں ریموٹ طریقے سے انجام دی جا رہی ہیں، جبکہ حساس اور تکنیکی نوعیت کے کاموں کے لیے محدود عملہ اب بھی اڈوں پر موجود ہے۔ خاص طور پر پائلٹس اور ٹیکنیکل اسٹاف کو اہم آپریشنز برقرار رکھنے کے لیے تعینات رکھا گیا ہے۔
دفاعی ماہرین کا کہنا ہے کہ یہ صورتحال امریکی فوج کے لیے ایک غیر معمولی چیلنج ہے، کیونکہ روایتی فوجی ڈھانچہ عارضی طور پر متاثر ہوا ہے۔ تاہم جدید ٹیکنالوجی اور ریموٹ آپریشنز کی مدد سے فوجی نظام کو جزوی طور پر فعال رکھا جا رہا ہے۔تجزیہ کاروں کے مطابق ایران اور امریکا کے درمیان بڑھتی ہوئی کشیدگی نہ صرف خطے کے امن کے لیے خطرہ بن رہی ہے بلکہ اس کے اثرات عالمی سطح پر بھی محسوس کیے جا رہے ہیں۔ موجودہ صورتحال اس بات کی نشاندہی کرتی ہے کہ اگر کشیدگی میں کمی نہ آئی تو مزید سنگین نتائج سامنے آ سکتے ہیں۔