اردوورلڈکینیڈا(ویب نیوز)آصف علی زرداری کی صدارت میں آج ایوان صدر میں ایک اہم اجلاس ہوگا، جس میں شہباز شریف اور وفاقی وزراء شریک ہوں گے۔ ذرائع کے مطابق اجلاس میں اعلیٰ عسکری قیادت اور وزرائے اعلیٰ کی شرکت بھی متوقع ہے۔
اجلاس کا مرکزی موضوع مشرق وسطیٰ کی صورتحال ہے، جس میں ایران، امریکا اور اسرائیل کے درمیان جاری تنازعات اور اب تک کی پیش رفت کا جائزہ لیا جائے گا۔ اس کے علاوہ خلیجی ممالک پر حملوں سے پیدا ہونے والی صورتحال بھی زیرِ بحث آئے گی۔ اسحاق ڈار اجلاس میں چار ملکی وزرائے خارجہ اجلاس پر اعتماد میں لائیں گے۔
اجلاس میں ملکی پٹرولیم ذخائر اور ترسیل کی صورتحال کا جائزہ لیا جائے گا، کفایت شعاری پالیسی اور اس پر عمل درآمد کے اقدامات پر غور کیا جائے گا۔ اس کے علاوہ ممکنہ سمارٹ لاک ڈاؤن اور دیگر انتظامی اقدامات پر بھی بریفنگ دی جائے گی۔
ذرائع کے مطابق آج کے اجلاس میں سمارٹ لاک ڈاؤن کے حوالے سے صوبوں کی تجاویز پر غور ہوگا، اور موٹر سائیکل و رکشہ ڈرائیورز کو سبسڈی فراہم کرنے سے متعلق بھی اہم فیصلے کیے جائیں گے۔ اجلاس میں ملکی استحکام اور عوامی سہولیات کو یقینی بنانے کے لیے جامع حکمت عملی پر بات چیت متوقع ہے۔
