اردو ورلڈ کینیڈا ( ویب نیوز ) ایران میں امریکا اور اسرائیل کے حملوں کے بعد شروع کی گئی ’جان فدا‘ عوامی مہم میں تین کروڑ سے زائد شہریوں کی رجسٹریشن کا دعویٰ کیا گیا ہے۔
جسے قومی یکجہتی اور دفاعی عزم کی علامت قرار دیا جا رہا ہے۔ایرانی پارلیمنٹ کے اسپیکر محمد باقر قالیباف نے کہا ہے کہ اس مہم میں بڑی تعداد میں عوام کی شرکت اس بات کا ثبوت ہے کہ ایرانی قوم اپنے ملک کے دفاع کے لیے مکمل طور پر تیار ہے۔ایرانی ذرائع ابلاغ کے مطابق انہوں نے کہا کہ عوام کی یہ بھرپور شرکت دشمن قوتوں کے لیے واضح پیغام ہے کہ ایرانی قوم متحد ہے اور ہر قسم کے حالات کا مقابلہ کرنے کی صلاحیت رکھتی ہے۔
ان کا کہنا تھا کہ قوم کے جذبۂ قربانی نے مخالفین کو حیران کر دیا ہے، اور ’جان فدا‘ مہم میں شامل ہونے والے رضاکار تاریخ میں اہم کردار ادا کریں گے۔ایران میں ’جان فدا‘ کو ایک رضاکارانہ قومی تحریک کے طور پر پیش کیا جا رہا ہے، جس میں شہری خود کو ملک کے دفاع، سلامتی اور دیگر قومی خدمات کے لیے پیش کرتے ہیں۔
یاد رہے کہ 28 فروری سے امریکا اور اسرائیل کے ساتھ جاری کشیدگی کے بعد جنگ بندی تو برقرار ہے، تاہم فریقین کے درمیان مذاکرات تاحال تعطل کا شکار ہیں۔ آبنائے ہرمز کی بندش اور امریکی پابندیوں نے خطے کی صورتحال کو مزید پیچیدہ بنا دیا ہے۔تجزیہ کاروں کے مطابق اس مہم کے اعداد و شمار کی آزادانہ تصدیق ابھی سامنے نہیں آئی، تاہم یہ دعویٰ ایران میں بڑھتی ہوئی قومی یکجہتی کی عکاسی کرتا ہے۔
