اردو ورلڈ کینیڈا ( ویب نیوز ) دفاعی شعبے میں ایک اہم پیش رفت سامنے آئی ہے جہاں نیٹو کی جانب سے کینیڈا کے تیار کردہ جدید نگرانی نظام کو منتخب کرنے کا امکان ظاہر کیا جا رہا ہے۔
میڈیا رپورٹس کے مطابق، نیٹو اپنے پرانے فضائی نگرانی نظام کو تبدیل کرنے پر غور کر رہا ہے، جس کے لیے ساب اور بمبارڈیئر کے اشتراک سے تیار کردہ “گلوبل آئی” سسٹم ایک مضبوط امیدوار کے طور پر سامنے آیا ہے۔ یہ نظام جدید ٹیکنالوجی سے لیس ہے جو طویل فاصلے سے فضائی، سمندری اور زمینی خطرات کی مؤثر نگرانی کر سکتا ہے۔اس وقت نیٹو کے پاس بوئنگ E-3A سنٹری طیاروں کا بیڑا موجود ہے، جو 1980 کی دہائی سے خدمات انجام دے رہا ہے اور امکان ہے کہ 2035 تک مرحلہ وار ریٹائر کر دیا جائے گا۔
نئے نظام کے انتخاب کا مقصد قبل از وقت وارننگ اور کنٹرول کی صلاحیتوں کو مزید بہتر بنانا ہے۔“گلوبل آئی” سسٹم کی خاص بات اس کی طویل پرواز کی صلاحیت ہے، جو 11 گھنٹے سے زائد ہو سکتی ہے، جبکہ اس میں عملے کی سہولت اور تھکاوٹ کو کم کرنے کے لیے جدید ڈیزائن شامل کیا گیا ہے۔اگر یہ معاہدہ طے پاتا ہے تو کینیڈا کے دفاعی اور ایرو اسپیس شعبے کو نمایاں معاشی فائدہ پہنچنے کی توقع ہے، جبکہ نیٹو کی مجموعی نگرانی صلاحیت میں بھی خاطر خواہ اضافہ ہوگا۔اگرچہ نیٹو حکام نے حتمی فیصلے کی تصدیق نہیں کی، تاہم انہوں نے اس بات کی تصدیق ضرور کی ہے کہ نئے ایئر بورن وارننگ اینڈ کنٹرول سسٹم پر کام جاری ہے۔
