اردوورلڈکینیڈا(ویب نیوز)حکومت نے پاسپورٹ سروسز میں اہم اصلاحات کرتے ہوئے دفاتر میں مکمل طور پر کیش لیس نظام نافذ کرنے کا فیصلہ کیا ہے، جس کا مقصد سروس کو شفاف اور تیز تر بنانا ہے۔
نئی پالیسی کے تحت نارمل پاسپورٹ کی فراہمی کا وقت اکیس دن سے کم کر کے چودہ دن کر دیا گیا ہے۔ حکام کے مطابق اس اقدام سے شہریوں کو دستاویزات کے حصول میں مزید سہولت میسر آئے گی اور انتظار کا وقت نمایاں طور پر کم ہو جائے گا۔
اعلان میں بتایا گیا ہے کہ آئندہ مرحلے میں پاسپورٹ کے کاروباری درجے کے اجرا کے لیے بھی تیاری شروع کر دی گئی ہے، جبکہ گھروں تک پاسپورٹ کی ترسیل کے نظام کو مزید مؤثر بنانے پر کام جاری ہے۔
مزید کہا گیا ہے کہ اگلے پندرہ دن کے اندر تمام پاسپورٹ دفاتر کو مکمل طور پر کیش لیس نظام پر منتقل کرنے کی ہدایت جاری کر دی گئی ہے۔ اس تبدیلی کے بعد نقد ادائیگی کا نظام ختم ہو جائے گا، جس سے بدعنوانی اور ایجنٹ مافیا کے کردار میں نمایاں کمی آنے کی توقع ہے۔
حکام کے مطابق اس اصلاحاتی عمل کا مقصد شہریوں کو براہ راست، شفاف اور جدید سہولیات فراہم کرنا ہے تاکہ پاسپورٹ کے حصول کا عمل زیادہ آسان، تیز اور قابل اعتماد بنایا جا سکے۔
