اردوورلڈکینیڈا(ویب نیوز)اسلام آباد ہائیکورٹ نے 190 ملین پاؤنڈ کیس میں اہم پیش رفت کرتے ہوئے مرکزی اپیلوں کو 7 مئی کو سماعت کے لیے مقرر کر دیا ہے۔
تفصیلات کے مطابق عدالت نے سابق وزیرِاعظم عمران خان اور ان کی اہلیہ بشریٰ بی بی کی جانب سے دائر کی گئی سزا کے خلاف اپیلوں کی سماعت طے کی ہے۔ اس کے ساتھ ہی عدالت نے سزا معطلی کی درخواستیں غیر مؤثر قرار دے کر نمٹا دیں۔
عدالت نے قرار دیا کہ پہلے مرکزی اپیلوں کو سنا جائے گا، جبکہ سزا معطلی کی درخواستیں علیحدہ طور پر سننے کی استدعا مسترد کر دی گئی۔
چیف جسٹس سردار سرفراز ڈوگر اور جسٹس محمد آصف پر مشتمل ڈویژن بینچ نے یہ فیصلہ سنایا۔ عدالت کے مطابق اپیلیں پہلے ہی سماعت کے لیے مقرر ہو چکی ہیں، اس لیے عبوری ریلیف کی درخواستوں کی مزید ضرورت باقی نہیں رہی۔
یاد رہے کہ احتساب عدالت نے اس مقدمے میں عمران خان کو چودہ سال قید اور دس لاکھ روپے جرمانے کی سزا سنائی تھی، جبکہ بشریٰ بی بی کو سات سال قید اور پانچ لاکھ روپے جرمانے کی سزا دی گئی تھی۔
دونوں فریقین نے مارچ دو ہزار پچیس میں سزا معطلی کی درخواستیں دائر کی تھیں، تاہم اب عدالت نے مرکزی اپیلوں پر براہ راست سماعت کا فیصلہ کیا ہے، جو کیس کے اگلے اہم مرحلے کی طرف پیش رفت سمجھی جا رہی ہے۔
