اردو ورلڈ کینیڈا ( ویب نیوز ) بھارت نے پاکستان کے ساتھ کسی بھی دوطرفہ کھیلوں کی سیریز کھیلنے سے انکار کر دیا ہے۔
بھارتی ذرائع ابلاغ کے مطابق بھارت کی حکومت پاکستان کے خلاف براہِ راست کھیلوں میں حصہ لینے کے حق میں نہیں ہے۔ اس سلسلے میں بھارتی وزارتِ کھیل نے مختلف کھیلوں کی تنظیموں اور بھارتی اولمپک انجمن کو ہدایات جاری کر دی ہیں۔وزارتِ کھیل کے مطابق بھارت اپنی سرزمین پر پاکستان کے ساتھ کسی بھی دوطرفہ سیریز کی میزبانی نہیں کرے گا اور نہ ہی اپنی ٹیموں کو پاکستان بھیجے گا۔ب
یان میں کہا گیا ہے کہ بھارتی ٹیمیں دوطرفہ مقابلوں کے لیے پاکستان کا دورہ نہیں کریں گی اور نہ ہی پاکستانی ٹیموں کو بھارت میں کھیلنے کی اجازت دی جائے گی۔تاہم کثیر ملکی مقابلوں کے حوالے سے بھارت کا کہنا ہے کہ ایسے مقابلوں میں شرکت کا فیصلہ بین الاقوامی کھیلوں کے اداروں کی پالیسی اور کھلاڑیوں کے مفاد کو مدنظر رکھتے ہوئے کیا جائے گا۔اس کا مطلب ہے کہ بھارتی کھلاڑی ان مقابلوں میں حصہ لیں گے جہاں پاکستانی ٹیمیں بھی شریک ہوں۔ اسی طرح اگر بھارت کسی بین الاقوامی مقابلے کی میزبانی کرے گا تو پاکستانی ٹیموں کو بھی شرکت کی اجازت دی جائے گی کیونکہ یہ عالمی کھیلوں کے اصولوں کے مطابق ہوگا۔
