اردو ورلڈ کینیڈا ( ویب نیوز ) ایران کے صدر مسعود پشیکان نے امریکا کو دو ٹوک پیغام دیتے ہوئے کہا ہے کہ ایران کسی بھی قسم کی دھمکی کے آگے نہیں جھکے گا اور اسلامی جمہوریہ کو خوفزدہ نہیں کیا جا سکتا۔

ایرانی صدر نے کہا کہ مسلمان صرف اللہ کے سامنے جھکتے ہیں اور کسی بھی طاقت کے دباؤ کو قبول نہیں کرتے۔ انہوں نے امریکی حکام پر زور دیا کہ ایران کو فوجی حملوں کی دھمکیاں دینا بند کی جائیں۔ان کا کہنا تھا کہ موجودہ عالمی نظام میں ناانصافی، قانون شکنی اور ظلم میں اضافہ ہو رہا ہے، جس کی بڑی وجہ یہ ہے کہ سیاست کو صرف طاقت تک محدود کر دیا گیا ہے۔ایرانی صدر نے مزید کہا کہ ایران خود کو ایک ذمہ دار ریاست کے طور پر پیش کرتا ہے جو اخلاقی اصولوں پر قائم ہے اور عالمی سطح پر انصاف اور استحکام کا حامی ہے۔ماہرین کے مطابق یہ بیان ایسے وقت میں سامنے آیا ہے جب ایران اور امریکہ کے درمیان کشیدگی میں اضافہ ہو رہا ہے اور خطے میں فوجی تناؤ بڑھتا جا رہا ہے۔