اردوورلڈکینیڈا(ویب نیوز)معروف مذہبی اسکالر مولانا طارق جمیل کی ایک ویڈیو سوشل میڈیا پر وائرل ہونے کے بعد بحث چھڑ گئی ہے، جس میں انہیں ایک بچے سے مصافحہ کرنے سے انکار کرتے ہوئے دکھایا گیا۔
اس ویڈیو پر مختلف حلقوں کی جانب سے تنقید سامنے آئی، جس کے بعد ان کے بیٹے یوسف جمیل نے معاملے پر تفصیلی وضاحت جاری کی ہے۔
یوسف جمیل نے انسٹاگرام پر اپنے ویڈیو بیان میں کہا کہ کسی بھی شخصیت پر تنقید کرنا ہر فرد کا حق ہے اور تنقید ضرور ہونی چاہیے، لیکن ساتھ ہی یہ بھی ضروری ہے کہ متعلقہ شخص کا مؤقف بھی سنا جائے تاکہ مکمل صورتحال واضح ہو سکے۔
انہوں نے کہا کہ اگرچہ یہ بات درست ہے کہ مولانا طارق جمیل کو بچے سے مصافحہ کر لینا چاہیے تھا، تاہم اصل صورتحال کو سمجھنا بھی ضروری ہے۔ ان کے مطابق مولانا طارق جمیل جیسی عوامی شخصیات روزانہ کی بنیاد پر ہزاروں لوگوں سے ملاقات کرتی ہیں اور مسلسل مصافحہ اور ملاقاتوں کے باعث جسمانی اور ذہنی تھکن ایک فطری امر ہے۔
یوسف جمیل نے کہا کہ جب کوئی شخص مسلسل ایک ہی نوعیت کے کام سے گزرتا ہے تو بعض اوقات اکتاہٹ اور تھکن پیدا ہونا انسانی فطرت کا حصہ ہے، اور اسے غیر معمولی یا منفی طور پر نہیں دیکھا جانا چاہیے۔
انہوں نے مزید کہا کہ مولانا طارق جمیل اکثر اپنے چاہنے والوں کی محبت کو قدر کی نگاہ سے دیکھتے ہیں اور ہمیشہ کوشش کرتے ہیں کہ کسی کی دل آزاری نہ ہو، تاہم وہ بھی ایک انسان ہیں اور انسانی حدود کے اندر رہ کر ہی سب کچھ ممکن ہوتا ہے۔
یوسف جمیل نے تنقید کرنے والوں سے اپیل کی کہ اگر ممکن ہو تو وہ ایک دن مولانا طارق جمیل کے ساتھ گزار کر دیکھیں تاکہ انہیں اندازہ ہو سکے کہ ایک عوامی شخصیت پر کتنا دباؤ اور مصروفیت ہوتی ہے۔
انہوں نے کہا کہ آج کے دور میں صرف ملاقات یا مصافحہ نہیں بلکہ تصاویر اور سیلفیز کا بھی دباؤ ہوتا ہے، جسے مسلسل نبھانا آسان نہیں ہوتا۔
بیان کے آخر میں انہوں نے کہا کہ اصل بات یہ ہے کہ مولانا طارق جمیل اپنے چاہنے والوں کی محبت کی قدر کرتے ہیں اور کبھی بھی کسی کی دل شکنی کا ارادہ نہیں رکھتے، لیکن ہر انسان اپنی جسمانی اور ذہنی حالت کے مطابق ہی ردعمل دیتا ہے۔
