اردوورلڈکینیڈا(ویب نیوز)البرٹا حکومت نے صوبے میں داخلے کے لیے لگے ہوئے پرانے سرحدی سائن بورڈز تبدیل کرنے کا فیصلہ کیا ہے جن پر “وائلڈ روز کنٹری” لکھا ہوا تھا۔ ان کی جگہ نئے سائن بورڈز لگائے جائیں گے جن پر صوبائی نعرہ “اسٹرونگ اینڈ فری” اور دیگر تازہ علامتیں شامل ہوں گی۔
یہ منصوبہ مجموعی طور پر 3.5 ملین ڈالر کی لاگت سے مکمل کیا جائے گا۔ حکومت کے مطابق صوبے میں موجود 22 سرحدی سائن بورڈز کو تبدیل کیا جائے گا جو برٹش کولمبیا، ساسکیچیوان، مونٹانا (امریکہ) اور شمال مغربی علاقوں کی سرحدوں پر نصب ہیں۔
یہ بھی پڑھیں :البرٹا میں ٹرانس جینڈر قوانین پر نیا تنازع،حکومت کا ناتھنگ اسٹینڈنگ کلاز پھر استعمال کرنے کا فیصلہ
حکام کا کہنا ہے کہ موجودہ سائن بورڈز اپنی عمر پوری کر چکے ہیں اور سخت موسمی حالات کے باعث خراب ہو چکے ہیں، اس لیے انہیں نئے ڈیزائن سے تبدیل کیا جا رہا ہے۔ پرانے سائن بورڈز تقریباً 40 سال سے زیادہ عرصے سے استعمال میں تھے جن پر “البرٹا میں خوش آمدید، وائلڈ روز کنٹری” درج تھا۔
نئے سائن بورڈز میں البرٹا کا روایتی پھول وائلڈ روز بھی شامل ہوگا۔ حکومتی وزیر ٹرانسپورٹ کے مطابق یہ تبدیلی صرف ظاہری اپگریڈ نہیں بلکہ صوبے کی نئی شناخت اور خوش آمدیدی انداز کو بہتر بنانے کے لیے کی جا رہی ہے۔
پرانے سائن بورڈز کے بارے میں ابھی حتمی فیصلہ نہیں ہوا، تاہم امکان ہے کہ انہیں عوامی دلچسپی کے لیے نیلامی کے ذریعے پیش کیا جائے گا۔
