اردو ورلڈ کینیڈا ( ویب نیوز ) انگلش کرکٹر اور بھارتی ٹیم کے سابق ساتھی لیام لیونگسٹن نے انکشاف کیا ہے کہ ویرات کوہلی نے بھارت میں غیر معمولی شہرت اور مسلسل عوامی توجہ کے باعث اپنی زندگی کے انداز میں تبدیلی لاتے ہوئے بیرونِ ملک منتقل ہونے کا فیصلہ کیا۔
ایک حالیہ انٹرویو میں لیونگسٹن نے کہا کہ ویرات کوہلی میدان کے باہر نہایت پُرسکون، خاندانی اور سادہ مزاج انسان ہیں، تاہم میدان میں وہ انتہائی جارحانہ اور مقابلہ کرنے والے کھلاڑی بن جاتے ہیں۔ان کے مطابق کوہلی کو بھارت میں ملنے والی بے حد مقبولیت اور ہر وقت میڈیا و عوام کی توجہ کا مرکز بنے رہنا زیادہ پسند نہیں تھا۔ وہ ایک ایسا ماحول چاہتے تھے جہاں انہیں نسبتاً سکون میسر ہو اور وہ آزادانہ طور پر اپنی نجی زندگی گزار سکیں۔
لیونگسٹن نے مزید کہا کہ کوہلی اپنے خاندان کے ساتھ وقت گزارنے کو ترجیح دیتے ہیں اور سفر و دنیا گھومنے کے شوقین ہیں، جبکہ مسلسل اسپاٹ لائٹ میں رہنا ان کے لیے ذہنی دباؤ کا باعث بنتا تھا۔انہوں نے بتایا کہ ویرات کوہلی کی ہر حرکت پر کیمرے موجود ہوتے ہیں اور ہر وقت عوامی توجہ ان کے ساتھ رہتی ہے، اسی وجہ سے انہوں نے اپنی بیٹی کی پیدائش کے بعد لندن منتقل ہونے کا فیصلہ کیا۔واضح رہے کہ ویرات کوہلی اپنی اہلیہ انوشکا شرما اور بچوں کے ہمراہ اس وقت لندن میں مقیم ہیں، جہاں وہ اپنی نجی زندگی کو زیادہ ترجیح دے رہے ہیں۔
