اردوورلڈکینیڈا(ویب نیوز)پاکستان تحریک انصاف کے چیئرمین بیرسٹر گوہر علی خان نے کہا ہے کہ سابق وزیراعظم عمران خان کو طبی معائنے اور علاج کے بعد دوبارہ اڈیالہ جیل منتقل کر دیا گیا ہے۔
سماجی رابطے کے پلیٹ فارم پر اپنے بیان میں بیرسٹر گوہر علی خان نے بتایا کہ انہیں اطلاع ملی ہے کہ گزشتہ شب عمران خان کو ایک بار پھر انجیکشن لگانے اور طبی جانچ کے لیے پمز اسپتال لے جایا گیا تھا۔ طبی معائنے اور ضروری علاج کے بعد انہیں واپس اڈیالہ جیل منتقل کر دیا گیا۔
انہوں نے کہا کہ پاکستان تحریک انصاف اپنے اس مؤقف پر قائم ہے کہ عمران خان کو بہتر طبی سہولیات کی فراہمی کے لیے فوری طور پر اسپتال منتقل کیا جانا چاہیے تاکہ ان کا مکمل اور تسلی بخش علاج ممکن بنایا جا سکے۔
بیرسٹر گوہر علی خان نے مزید مطالبہ کیا کہ عمران خان کی اہل خانہ سے فوری ملاقات کروائی جائے اور انہیں اپنے خاندان سے رابطے کی مناسب سہولت فراہم کی جائے۔
تحریک انصاف کی قیادت کا کہنا ہے کہ عمران خان کی صحت سے متعلق معاملات پر مسلسل نگرانی کی جا رہی ہے اور جماعت اس حوالے سے متعلقہ حکام سے رابطے میں ہے۔ دوسری جانب حکومتی یا جیل انتظامیہ کی جانب سے اس بیان پر تاحال کوئی باضابطہ ردعمل سامنے نہیں آیا۔
