اردوورلڈکینیڈا(ویب نیوز)کینیڈا کے شہر کیلگری میں ایو کلیئر پلازہ پر منعقد ہونے والا "ٹیسٹ آف وینزویلا” میلہ جہاں وینزویلا کے کھانوں اور ثقافت کا جشن منانے کے لیے سجایا گیا تھا، وہیں وطن میں آنے والے تباہ کن زلزلوں کے بعد یہ تقریب متاثرین سے اظہارِ یکجہتی اور امدادی سرگرمیوں کا مرکز بن گئی۔
تقریب میں شریک وینزویلا سے نو برس قبل کینیڈا منتقل ہونے والی میلانا واریو نے کہا کہ اگرچہ ان کے قریبی اہلِ خانہ محفوظ ہیں، تاہم وہ ان ہزاروں افراد کے دکھ کو شدت سے محسوس کر رہی ہیں جو اپنے پیاروں کی تلاش میں ہیں۔
انہوں نے کہا، "اس وقت میرے دل میں صرف غم ہے۔ ہمیں سب کی مدد کی ضرورت ہے۔ لوگ اپنے خاندان، دوستوں اور بچوں کو تلاش کر رہے ہیں۔میلانا واریو نے بتایا کہ انہوں نے ایسی ویڈیوز دیکھیں جن میں لوگ ملبے تلے دبے ہوئے تھے، جبکہ باہر موجود افراد بھاری ملبہ نہ ہٹا سکنے کے باعث ان کی مدد نہیں کر پا رہے تھے، جس سے ان کا دل ٹوٹ گیا۔
بدھ کے روز آنے والے 7.2 اور 7.5 شدت کے مسلسل دو زلزلوں کے نتیجے میں اب تک ایک ہزار چار سو سے زائد افراد ہلاک ہونے کی تصدیق ہو چکی ہے، جبکہ ہزاروں زخمی ہیں۔ ہفتے تک کم از کم 68 ہزار 900 افراد لاپتا ہونے کی اطلاعات بھی سامنے آ چکی ہیں۔
تقریب میں شریک البرین پورٹیلو نے بتایا کہ کاراکاس میں موجود ان کے چچا محفوظ ہیں، تاہم زلزلہ متاثرہ علاقے میں ان کی ملازمت ختم ہو گئی ہے۔ ان کا کہنا تھا کہ پورے وینزویلا میں لوگ اپنی استطاعت سے بڑھ کر خوراک اور امدادی سامان جمع کر کے متاثرین کی مدد کر رہے ہیں۔
انہوں نے کہا، "یہ ملک پر آنے والی سب سے تباہ کن آفات میں سے ایک ہے، لیکن اس کے باوجود لوگ اپنے پاس موجود تھوڑا بہت سامان بھی دوسروں کی مدد کے لیے دے رہے ہیں۔”
"ٹیسٹ آف وینزویلا” کے منتظم ارنیسٹو گوڈینو نے کہا کہ اس وقت مالی امداد یقیناً ضروری ہے، تاہم ایک دوسرے کے ساتھ کھڑے ہونا، دعائیں کرنا اور درست معلومات کا تبادلہ بھی اتنا ہی اہم ہے۔
انہوں نے کہا، "مجھے بہت دکھ ہے، لیکن زندگی چلتی رہتی ہے۔ یہ موقع ہے کہ ہم اکٹھے ہوں، یہ ثابت کریں کہ ہم ایک آواز ہیں اور مل کر زیادہ کچھ کر سکتے ہیں۔”
ان کا مزید کہنا تھا کہ کیلگری میں مقیم وینزویلا کی کمیونٹی اس مشکل وقت میں متاثرین کی ہر ممکن مدد کے لیے متحد ہے اور رقم، دعاؤں اور معلومات کی فراہمی کے ذریعے اپنا کردار ادا کر رہی ہے۔
تقریب کے دوران جمع ہونے والے عطیات کینیڈین گلوبل ریسپانس نامی فلاحی ادارے کے ذریعے وینزویلا میں زلزلہ متاثرین کی امداد کے لیے فراہم کیے جائیں گے۔
