اردوورلڈکینیڈا(ویب نیوز)کینیڈا بھر میں آج یکم جولائی کو کینیڈا ڈے بھرپور جوش و خروش سے منایا جا رہا ہے، جبکہ کیلگری میں ملک کے 159ویں یومِ تاسیس کے موقع پر مختلف مقامات پر رنگا رنگ تقریبات، ثقافتی پروگرام، موسیقی، آتش بازی اور عوام کے لیے خصوصی سفری سہولیات کا انتظام کیا گیا ہے۔

شہری حکومت کے مطابق دن بھر ڈاؤن ٹاؤن کیلگری، پارکس، پلازوں اور دریا کے کنارے مختلف تقریبات منعقد ہوں گی، جہاں شہریوں اور سیاحوں کے لیے موسیقی، ثقافتی سرگرمیوں اور تفریحی پروگراموں کا اہتمام کیا گیا ہے۔ مختلف تقریبات کے مقامات کے درمیان آمدورفت آسان بنانے کے لیے مفت شٹل سروس بھی فراہم کی جا رہی ہے۔

پرنسز آئی لینڈ پارک میں مرکزی تقریب

کینیڈا ڈے کی مرکزی تقریب پرنسز آئی لینڈ پارک میں منعقد ہوگی، جہاں دوپہر 2 بجے قومی ترانے اور لینڈ ایکنالوجمنٹ کے ساتھ پروگرام کا آغاز ہوگا۔

تقریب میں مائیکا سیج، جیمی فائنر، کارڈینل آفیشل، ٹیا ووڈ اور معروف بینڈ Walk off the Earth اپنی پرفارمنس پیش کریں گے، جبکہ آخری موسیقی پروگرام رات 8 بجے ہوگا۔

دی کنفلوئنس میں مقامی ثقافت کی جھلک

دی کنفلوئنس میں مقامی (Indigenous) ثقافت کو اجاگر کرنے کے لیے خصوصی پروگرام رکھا گیا ہے، جس میں پاووو، آرٹس اینڈ کرافٹس مارکیٹ، کھانے پینے کے اسٹالز، ٹیپیز اور ٹریپرز ٹینٹس عوام کی توجہ کا مرکز ہوں گے۔

اس کے علاوہ اسٹوڈیو بیل اور نیشنل میوزک سینٹر اپنی دسویں سالگرہ منا رہے ہیں، جبکہ کنگ ایڈی میں بھی خصوصی تقریبات صبح 10 بجے سے شروع ہوں گی۔

شہر کے دیگر مقامات جن میں سین لوک پارک، میونسپل بلڈنگ، ہیری ہیز گرین اسپیس، ایسٹ ولیج اور او کلیئر پلازہ شامل ہیں، وہاں بھی مختلف تفریحی اور ثقافتی سرگرمیاں جاری رہیں گی۔

رات 11 بجے شاندار آتش بازی

تقریبات کا اختتام رات 11 بجے اسٹیمپیڈ پارک میں شاندار آتش بازی سے ہوگا۔

اس سال عوام کے لیے میکس بیل سینٹر کی پارکنگ اور اس سے ملحقہ گرین اسپیس کو خصوصی ویونگ ایریا بنایا گیا ہے، جہاں صرف آتش بازی دیکھنے کی سہولت ہوگی۔ مقام پر واش رومز سمیت بنیادی سہولیات دستیاب ہوں گی۔

انتظامیہ نے شہریوں کو مشورہ دیا ہے کہ وہ اپنی گاڑی استعمال کرنے کے بجائے فرینکلن یا بارلو/میکس بیل ایل آر ٹی اسٹیشن تک ٹرین کے ذریعے سفر کریں، کیونکہ دونوں اسٹیشن آتش بازی کے مقام سے پیدل فاصلے پر واقع ہیں۔

مفت شٹل سروس

شہری حکومت کی جانب سے صبح 11 بجے سے شام 6 بجے تک مفت شٹل سروس چلائی جائے گی، جو او کلیئر اور ایسٹ ولیج کے درمیان مختلف تقریبات کے مقامات تک شہریوں کو لے جائے گی۔

یہ بسیں ہر 15 منٹ بعد دستیاب ہوں گی تاکہ مختلف مقامات کے درمیان سفر آسان بنایا جا سکے۔

پارکنگ کی خصوصی سہولت

کینیڈا ڈے کے موقع پر بیشتر پارک پلس زونز اور متعدد سٹی پارکنگ پارکیڈز میں مفت پارکنگ فراہم کی جا رہی ہے، تاہم ورکلنڈ سینٹر کے لاٹ 24 پر معمول کے مطابق ہفتہ وار نرخ لاگو ہوں گے۔

اسی طرح ٹیلس اسپارک، جوبلی آڈیٹوریم اور ہیریٹیج پارک کی پارکنگ پر معمول کے نرخ برقرار رہیں گے۔

شہر کے متعدد پارکیڈز اور پارکنگ لاٹس عوام کے لیے مفت دستیاب ہوں گے، جبکہ چند مخصوص مقامات پر معمول کے مطابق فیس وصول کی جائے گی۔

پارکنگ پر پابندیاں

انتظامیہ نے واضح کیا ہے کہ عوامی تحفظ اور ٹریفک کی روانی برقرار رکھنے کے لیے او کلیئر اور ایسٹ ولیج کے بعض علاقوں میں یکم جولائی کو پارکنگ کی اجازت نہیں ہوگی۔

او کلیئر میں صبح 7 بجے سے رات 10 بجے تک جبکہ ایسٹ ولیج کے مخصوص حصوں میں صبح 7 بجے سے شام 6 بجے تک گاڑیاں کھڑی کرنے پر پابندی رہے گی۔

سڑکوں کی بندش

او کلیئر میں بارکلے پریڈ ایس ڈبلیو پر صبح 6 بجے سے رات 9 بجے تک عام ٹریفک کے لیے پابندی ہوگی، تاہم شیرٹن ہوٹل جانے والے مہمانوں کو داخلے کی اجازت دی جائے گی۔

ایسٹ ولیج میں متعدد سڑکیں صبح 6 بجے سے رات 12 بجے تک بند رہیں گی، جن میں 8 ایونیو ایس ای، 5 اسٹریٹ اور 6 اسٹریٹ کے مختلف حصے شامل ہیں۔

ٹرانزٹ سروس

کینیڈا ڈے کے موقع پر کیلگری ٹرانزٹ، سی ٹرین اور بسیں اتوار کے شیڈول کے مطابق چلیں گی۔

بند رہنے والی سہولیات

شہری حکومت کے مطابق یکم جولائی کو تمام اریناز، انڈور سوئمنگ پولز، فٹنس سینٹرز، ساؤتھ لینڈ اور ولیج اسکوائر لیزر سینٹرز، میکس ویل سوکر سینٹر، نارتھ ماؤنٹ پلیزنٹ اور وائلڈ فلاور آرٹس سینٹرز، اینیمل سروسز سینٹر بند رہیں گے۔

اس کے علاوہ رجسٹرڈ پروگرامز، ڈراپ اِن سرگرمیاں اور سوئمنگ کلاسز بھی آج منعقد نہیں ہوں گی۔