اردوورلڈکینیڈا(ویب نیوز)پاک فوج کے شعبہ تعلقاتِ عامہ (آئی ایس پی آر) نے کہا ہے کہ افغان طالبان حکومت کی جانب سے بلوچستان کی سرحد کی طرف چار ڈرون بھیجے گئے، جنہیں پاکستان کے فضائی دفاعی نظام نے بروقت نشانہ بنا کر تباہ کر دیا۔
آئی ایس پی آر کے جاری کردہ بیان کے مطابق 30 جون کو افغان طالبان حکومت نے اپنی زیرِ انتظام علاقے سے بلوچستان کی سرحد کی جانب چار ابتدائی نوعیت کے ڈرون بھیجے۔ بیان میں کہا گیا کہ پاکستان کے مضبوط فضائی دفاعی نظام نے ان تمام ڈرونز کی فوری نشاندہی کر لی۔
ترجمان پاک فوج کے مطابق سکیورٹی فورسز نے اعلیٰ سطح کی آپریشنل تیاری کا مظاہرہ کرتے ہوئے جدید دفاعی اقدامات کے ذریعے چاروں ڈرونز کو کامیابی سے مار گرایا، جس کے نتیجے میں مبینہ طور پر دشمن کے تمام عزائم ناکام بنا دیے گئے۔
آئی ایس پی آر نے الزام عائد کیا کہ افغان طالبان حکومت اپنی سرزمین پر سرگرم دہشت گرد تنظیموں کی سرپرستی کا سلسلہ جاری رکھے ہوئے ہے۔ بیان میں کہا گیا کہ اس نوعیت کی کارروائیوں کا مقصد اپنی حکومت کے زیرِ اثر مشکلات کا شکار افغان عوام کی توجہ ہٹانا ہے۔
بیان میں مزید کہا گیا کہ افغان طالبان کو اپنے عوام کو ایسے اقدامات اور بیانات کے ذریعے مطمئن کرنے کے بجائے دہشت گردی کی سرپرستی ترک کرنی چاہیے اور پُرامن بقائے باہمی کے اصولوں پر عمل کرنا چاہیے۔
آئی ایس پی آر نے خبردار کیا کہ اگر افغان طالبان کی جانب سے پاکستان کے خلاف اشتعال انگیزی یا سرحد پار کارروائیاں جاری رہیں تو انہیں مؤثر جواب دیا جائے گا، جس کی بھاری قیمت چکانا پڑے گی۔
ترجمان پاک فوج نے کہا کہ پاکستان کی مسلح افواج ملک کے چپے چپے کے دفاع کے لیے مکمل طور پر چوکس اور ہر وقت تیار ہیں، جبکہ پاکستان کی خودمختاری یا عوام کے جان و مال کو خطرے میں ڈالنے والی کسی بھی سرحد پار مہم جوئی یا اشتعال انگیزی کا فوری، فیصلہ کن اور بھرپور جواب آپریشن غضب للحق کے تحت دیا جاتا رہے گا۔
