اردوورلڈکینیڈا(ویب نیوز)اسلام آباد میں خاتون کو مبینہ اغوا کی کوشش سے بچاتے ہوئے پاک فضائیہ کے گروپ کیپٹن عاصم شہید ہو گئے، جبکہ ملزم فائرنگ کے بعد موقع سے فرار ہو گیا۔
ابتدائی اطلاعات کے مطابق گروپ کیپٹن عاصم نائنتھ ایونیو سے گزر رہے تھے کہ انہوں نے ایک موٹرسائیکل کے قریب ایک خاتون کو پریشان حالت میں دیکھا، جہاں مبینہ طور پر موٹرسائیکل سوار خاتون کا ہاتھ کھینچ رہا تھا۔
رپورٹ کے مطابق گروپ کیپٹن عاصم ایک ذمہ دار شہری کی حیثیت سے واپس مڑے اور موٹرسائیکل کے قریب جا کر رکے، جس پر خاتون بھاگ کر ان کی گاڑی کی دوسری جانب آ گئی۔ اسی دوران مبینہ ملزم، جس کی شناخت سعد کے نام سے ہوئی ہے، نے گروپ کیپٹن عاصم سے تلخ کلامی شروع کر دی اور کچھ ہی لمحوں بعد ان پر فائرنگ کر دی۔
گروپ کیپٹن عاصم شدید زخمی ہوئے اور زخموں کی تاب نہ لاتے ہوئے شہید ہو گئے، جبکہ ملزم جائے وقوعہ سے فرار ہونے میں کامیاب ہو گیا۔
پولیس کے مطابق خاتون نے اپنے بیان میں بتایا کہ ملزم اس کا دفتر میں ساتھی ملازم تھا، جس نے اسے کام پر ساتھ لے جانے کی پیشکش کی تھی، تاہم راستے میں اس نے گاڑی کا رخ تبدیل کر لیا اور اسے کسی اور مقام پر لے جانے کی کوشش کی، جس پر دونوں کے درمیان مزاحمت ہوئی۔
خاتون کا کہنا تھا کہ گروپ کیپٹن عاصم نے بروقت مداخلت کرکے اسے محفوظ بنایا اور ممکنہ نقصان سے بچا لیا۔پولیس کے مطابق قانون نافذ کرنے والے ادارے ملزم کی گرفتاری کے لیے کارروائیاں کر رہے ہیں۔
گروپ کیپٹن عاصم اپنے سوگواران میں بیوہ، ایک بیٹی اور ایک بیٹا چھوڑ گئے ہیں۔ ان کی قربانی پر ملک بھر میں انہیں خراجِ عقیدت پیش کیا جا رہا ہے، جبکہ قومی اور سماجی حلقوں میں انہیں ایک بہادر افسر کے طور پر یاد کیا جا رہا ہے جنہوں نے ایک خاتون کی جان بچانے کی کوشش میں اپنی جان قربان کر دی۔
نوٹ: واقعے کی بعض تفصیلات ابتدائی اطلاعات اور متعلقہ خاتون کے بیان پر مبنی ہیں۔ پولیس کی تحقیقات جاری ہیں، اس لیے مزید حقائق سامنے آنے پر سرکاری مؤقف میں تبدیلی آ سکتی ہے۔
