اردوورلڈکینیڈا(ویب نیوز)پنجاب ڈیزاسٹر مینجمنٹ اتھارٹی (پی ڈی ایم اے) نے آئندہ دو روز کے دوران پنجاب کے بیشتر اضلاع میں بارشوں کی پیش گوئی کرتے ہوئے متعلقہ اداروں کو الرٹ جاری کر دیا ہے۔
ترجمان پی ڈی ایم اے کے مطابق لاہور، راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد، وزیر آباد، فیصل آباد، خوشاب اور سرگودھا میں بارش کا امکان ہے۔
اسی طرح ساہیوال، شیخوپورہ، سیالکوٹ، نارووال، جھنگ، ٹوبہ ٹیک سنگھ، ننکانہ صاحب، چنیوٹ اور گردونواح میں بھی بارش متوقع ہے۔
پی ڈی ایم اے کے مطابق چنیوٹ، اوکاڑہ، قصور، نورپور تھل، بھکر، میانوالی، لیہ، بہاولپور، بہاولنگر، ڈیرہ غازی خان، ملتان، خانیوال، لودھراں، مظفرگڑھ، کوٹ ادو، رحیم یار خان اور راجن پور میں بھی بارش ہونے کا امکان ہے۔
ڈی جی پی ڈی ایم اے عمر جاوید نے کہا کہ وزیراعلیٰ پنجاب مریم نواز کی ہدایات پر صوبے بھر کے کمشنرز اور ڈپٹی کمشنرز کو الرٹ جاری کر دیا گیا ہے۔
انہوں نے کہا کہ متوقع بارشوں کے باعث دریاؤں اور ندی نالوں میں پانی کے بہاؤ میں اضافہ ہو سکتا ہے، اس لیے متعلقہ ادارے ہر ممکن احتیاطی اقدامات یقینی بنائیں۔
ڈی جی پی ڈی ایم اے نے شہریوں کو ہدایت کی کہ آسمانی بجلی کے دوران محفوظ مقامات پر رہیں، گرج چمک کے وقت کھلے مقامات پر جانے سے گریز کریں، جبکہ گردوغبار اور تیز آندھی کے دوران بھی غیر ضروری طور پر گھروں سے باہر نہ نکلیں۔
انہوں نے شمالی علاقہ جات کا سفر کرنے والے سیاحوں کو بھی احتیاطی تدابیر اختیار کرنے اور موسمی صورتحال سے باخبر رہنے کی ہدایت کی۔
