اسلام آباد ہائی کورٹ نے مارگلہ ہلز نیشنل پارک میں تعمیرات سے متعلق کیس کا تفصیلی فیصلہ جاری کردیا۔
اسلام آباد ہائی کورٹ نے نیوی گالف کورس کی تعمیر کو غیر قانونی قرار دیتے ہوئے وزارت دفاع کو انکوائری کی ہدایت کردی۔ عدالت نے سیکرٹری دفاع کو قومی خزانے کو پہنچنے والے نقصان کا اندازہ لگانے کے لیے فرانزک آڈٹ کرانے کی بھی ہدایت کی۔
عدالت نے نیشنل پارک میں 8068 ایکڑ اراضی پر پاکستان آرمی ڈائریکٹوریٹ کی ملکیت کا دعویٰ بھی مسترد کردیا۔
اسلام آباد ہائی کورٹ کے چیف جسٹس اطہر من اللہ کی جانب سے جاری کیے گئے تفصیلی فیصلے میں مونال ریسٹورنٹ کے ساتھ پاک فوج کے فارمز ڈائریکٹوریٹ کے لیز کے معاہدے کو بھی غیر قانونی قرار دیا گیا۔
108 صفحات پر مشتمل تفصیلی فیصلے میں اسلام آباد ماحولیاتی کمیشن کی رپورٹ بھی شامل کی گئی ہے۔ عدالت نے کہا کہ ریاستی اور سرکاری افسران کا فرض ہے کہ وہ مارگلہ ہلز کی حفاظت کریں، ملوث افراد کے خلاف کارروائی کرنا ریاست کی ذمہ داری ہے۔ یہ ستم ظریفی ہے کہ مارگلہ ہلز کے محفوظ نوٹیفائیڈ ایریا میں ریاستی ادارے بھی ملوث ہیں۔
