اردو ورلڈ کینیڈا ( ویب نیوز)وفاقی تحقیقاتی ادارے نے فارن فنڈنگ کیس کو منی لانڈرنگ کیس میں تبدیل کرتے ہوئے عمران خان کو مرکزی ملزم نامزد کر دیا، جس کے تحت انہیں پیشی اور عدم پیشی پر گرفتاری کا سمن نوٹس بھی جاری کر دیا گیا ہے
ایف آئی اے کراچی نے منی لانڈرنگ کیس میں چیئرمین پی ٹی آئی عمران خان کو 31 اکتوبر کو ان کی رہائش گاہ بنی گالہ اور زمان پارک لاہور میں دوسرا سمن نوٹس بھجوا دیا ہے۔
عمران خان کو دستاویزات کے ساتھ پیر 31 اکتوبر کو ایف آئی اے کراچی کے سامنے پیش ہونے کی ہدایت کی گئی ہے۔
ایف آئی اے نے موقف اپنایا کہ عمران خان نے اسلام آباد میں قائم نجی بینک کی جناح ایونیو برانچ سے بیرون ملک سے کروڑوں روپے نکلوائے اور اکاؤنٹ خود استعمال کیا۔
ذرائع کے مطابق عمران خان ایف آئی اے کے سامنے پیش نہ ہوئے تو انہیں گرفتار کیے جانے کا امکان ہے کیونکہ پی ٹی آئی چیئرمین نے حفاظتی ضمانت کے لیے عدالت سے رجوع نہیں کیا۔
ایف آئی اے ذرائع کے مطابق فارن فنڈنگ کیس میں کراچی سے پی ٹی آئی کے تین اہم رہنماؤں کی گرفتاری کا امکان ہے اور اگر عمران پیر کو پیش نہ ہوئے تو ایف آئی اے کراچی کی ٹیم آئندہ ہفتے عمران کی گرفتاری کے لیے اسلام آباد روانہ ہوگی
