اردو ورلڈ کینیڈا ( ویب نیوز ) پیپلزپارٹی کے سینیٹر مصطفی نواز کھوکھر نے سینیٹ کی رکنیت سے باقاعدہ ا ستعفٰی دے دیا۔
سینیٹر مصطفی نواز کھوکھر نے اپنا استعفیٰ چیئرمین سینیٹ صادق سنجرانی کو پیش کردیا، انہوں نے اپنے استعفی میں لکھا کہ سینیٹر فاروق ایچ نائیک کی ہدایت پر استعفی دے رہے ہیں۔
مصطفی نواز کھوکھر نے کہا کہ وہ اس فیصلے سے خوش ہیں اور عوامی مفاد کے معاملات پر اپنی رائے کے اظہار کے حق کو بھی قدر کی نگاہ سے دیکھتے ہیں۔
انہوں نے سندھ سے سینیٹ کی نشست دینے پر پارٹی قیادت کا مزید شکریہ ادا کیا انہوں نے کہا کہ، "اختلافات کو ایک طرف رکھتے ہوئے میرا یہ سفر شاندار سفر رہا ہے اور میں ان کے لیے نیک خواہشات کا اظہار کرتا ہوں۔
مزید برآں پیپلز پارٹی کے رہنما نے سوال اٹھایا کہ کیا ہم ہندوستانی لوک سبھا کے ممبر ہیں؟ کیوں ہمارے فون مسلسل ٹیپ کیے جاتے ہیں؟ ہماری نقل و حرکت کی نگرانی اور رازداری پر حملہ کیوں کیا جاتا ہے؟انہوں نے مزید کہا کہ ہم ریاست کا اتنا ہی حصہ ہیں جتنا کوئی اور ہم غدار نہیں ہیں۔
