اردو ورلڈ کینیڈا ( ویب نیوز)وفاقی حکومت نے پاکستان تحریک انصاف کے ایم این ایز کے مزید استعفے قبول نہ کرنے کا فیصلہ کیا ہے۔
اس معاملے سے باخبر ذرائع نے بتایا کہ مرکز نے پی ٹی آئی کے استعفوں کے معاملے پر یو ٹرن لیا اور مزید استعفے قبول نہ کرنے کا فیصلہ کیا۔
واضح رہے کہ 28 جولائی کو سپیکر قومی اسمبلی راجہ پرویز اشرف نے پاکستان تحریک انصاف کے 11 ایم این ایز کے استعفے منظور کر لیے تھے۔
پی ٹی آئی کے قانون سازوں نے 11 اپریل کو سابق وزیر اعظم عمران خان کے خلاف پارلیمنٹ میں مشترکہ اپوزیشن کی طرف سے پیش کی گئی تحریک عدم اعتماد کے کامیاب ہونے کے بعد انہیں اعلیٰ عہدے سے ہٹائے جانے کے دو دن بعد اجتماعی طور پر استعفیٰ دے دیا تھا۔
سپیکر نے آئین پاکستان کے آرٹیکل 64 کی شق (1) کے تحت حاصل اختیارات کو بروئے کار لاتے ہوئے استعفیٰ منظور کیا۔
اس حوالے سے قومی اسمبلی سیکرٹریٹ نے نوٹیفکیشن بھی جاری کر دیا ہے۔
ترجمان قومی اسمبلی کے مطابق استعفوں کی منظوری سے متعلق نوٹیفکیشن مزید کارروائی کے لیے الیکشن کمیشن آف پاکستان کو بھجوا دیا گیا ہے۔
جن کے استعفے منظور کیے گئے ان میں شیریں مزاری، علی محمد خان، فضل محمد خان، شوکت خان، فخر زمان خان، فرخ حبیب، اعجاز شاہ، اکرم چیمہ، جمیل احمد خان، شاندانہ گلزار اور عبدالشکور شاد شامل ہیں۔
