اردو ورلڈ کینیڈا ( ویب نیوز)پاکستان کرکٹ بورڈ کی انتظامی کمیٹی نے پاکستان سپر لیگ سیزن 2023 کے میچز کوئٹہ میں کرانے کا اعلان کیا ہے۔
تفصیلات کے مطابق کمیٹی کے سربراہ نجم سیٹھی نے پاکستان سپر لیگ کے آٹھویں سیزن کے میچز بلوچستان کے دارالحکومت کوئٹہ میں کرانے کا اعلان نیشنل ہائی پرفارمنس سینٹر میں پہلے اجلاس کے بعد میڈیا سے گفتگو کرتے ہوئے کیا۔
انہوں نے کہا کہ سیکیورٹی اداروں کی جانب سے کوئٹہ میں مکمل سکیورٹی کی یقین دہانی کرائی گئی ہے، اسی لیے انہوں نے میچز کوئٹہ میں کرانے کا فیصلہ کیا۔
نجم سیٹھی کا کہنا تھا کہ نئی سلیکشن کمیٹی کا اعلان جلد کیا جائے گا انہوں نے قومی ٹیم کے لیے تجربہ کار غیر ملکی کوچز لانے کا عندیہ بھی دیا۔
میڈیا سے گفتگو کرتے ہوئے کمیٹی کے سربراہ نے کہا کہ ایجنڈے میں بہت سی چیزیں تھیں جو مکمل نہیں ہوسکیں، اب دوبارہ اجلاس ہوگا، فی الحال ہم نے سلیکشن کمیٹی سمیت تمام کمیٹیاں ختم کردی ہیں۔
پاکستان نیوزی لینڈ سیریز کا شیڈول تبدیل
انہوں نے یقین دلایا کہ ڈومیسٹک پاکستان کپ شیڈول کے مطابق ہوگا تاہم دیگر تمام پروگرام روک دیئے گئے ہیں اور ڈومیسٹک کوچز کو بھی فارغ کیا جارہا ہے۔
نجم سیٹھی نے کہا کہ چھ علاقائی ایسوسی ایشنز کو ختم کر دیا گیا ہے، بورڈ ملازمین کی تنخواہوں پر نظرثانی کرے گا جب کہ باقی نظام کا ازسرنو جائزہ لیا جائے گا۔
